بیجنگ (شِنہوا) چینی استغاثہ  نے چھنگ ہائی صوبائی پیپلز کانگریس کی قائمہ کمیٹی کے سابق وائس چیئرمین لی جی شیانگ کے خلاف رشوت لینے کے الزام میں فرد جرم دائر کر دی ہے۔

لی اس سے قبل کمیونسٹ پارٹی آف چائنہ کی چھنگ ہائی صوبائی کمیٹی کی قائمہ کمیٹی کے رکن بھی تھے۔ یہ مقدمہ لی کے کیس کے نگران قومی کمیشن کی تحقیقات مکمل ہونے پر درج کیا گیاتھا، تیانجن میونسپل پیپلز پروکیورٹوریٹ کی سیکنڈ برانچ نے تیانجن کی سیکنڈانٹرمیڈیٹ پیپلز کورٹ میں مقدمہ دائر کیا ہے۔ فرد جرم میں کہا گیا ہے کہ لی نے اندرونی منگولیا خود اختیارعلاقے میں اپنے مختلف عہدوں کا فائدہ اٹھاتے ہوئے دوسروں کے لیے فوائد حاصل کیے اور بدلے میں "خصوصی طور سے بھاری رقم" اور تحائف قبول کیے۔

ووہان(شِنہوا) چین میں 2023ء کے دوران وسطی صوبہ ہوبے میں جی ڈی پی کی نشوونما 6.5 فیصد رہنے کی توقع ہے۔

ہوبے کے گورنر وانگ ژونگ لِن نے جمعہ کے روز صوبائی پیپلز کانگریس کے سالانہ اجلاس میں حکومتی کارکردگی رپورٹ پیش کرتے ہوئے بتایا کہ گزشتہ سال صوبے کی جی ڈی پی 50 کھرب یوآن(7 کھرب 43 ارب امریکی ڈالر) سے تجاوز کرنے کا تخمینہ لگایا گیا ہے جس میں تقریباً 4.7 فیصد کی شرح سے نشوونما ہوئی ہے۔

وانگ نے بتایا کہ نوول کرونا وائرس کی وجہ سے پیدا ہونے والی مشکلات کے باوجود ہوبے نے 2022ء میں 11 ہزار 377 بڑے منصوبوں کی تعمیر کا آغاز کیا جن میں سے ہر ایک پر 10 کروڑ یوآن سے زائد کی سرمایہ کاری کی گئی ہے جو کہ تاریخ میں ایک ریکارڈ ہے۔

گورنر نے بتایا کہ صوبہ 2023ء کے دوران نئی صنعتوں کو فروغ اور نئی توانائی سے چلنے والی گاڑیوں کی پیداوار کو بڑھانا چاہتا ہے۔ ہوبے میں مستقبل کی صنعتوں جیسے کوانٹم انفارمیشن، دماغی سائنس اور میٹاورس کو بھی فروغ دیا جائیگا۔

بیجنگ(شِنہوا) چینی وزیرتجارت نےامریکہ سےدوطرفہ اقتصادی اورتجارتی تعلقات کو جلد از جلد درست راستے پرلانے کے لیے اقدامات اٹھانے کا مطالبہ کیا ہے۔

وزارت تجارت کے مطابق وزیر تجارت وانگ وینتاؤ نے ان خیالات کا اظہارویڈیو لنک کے ذریعے یو ایس چائنہ بزنس کونسل کے صدر کریگ ایلن سے ملاقات کے دوران کیا۔

وانگ نے کہا کہ دونوں ممالک کے درمیان وسیع مشترکہ مفادات اور تعاون کی گنجائش موجود ہے اور یہ کہ دوطرفہ اقتصادی اور تجارتی تعاون دونوں ممالک کے عوام کی فلاح و بہبود کے لیے فائدہ مند اوراس کا عالمی اقتصادی ترقی میں اہم کردار ہے۔ وانگ نے کہا کہ امریکی حکومت نے چین-امریکہ تعلقات کو"اسٹریٹجک مسابقت"قرار دیتے ہوئے چین کے خلاف تجارت اور سرمایہ کاری پابندیوں اورمسلسل تحفظ پسندانہ طرز عمل  اختیار کررکھا ہے جس سے دونوں ممالک کے کاروباری اداروں اور عوام کے مفادات کو نقصان پہنچا ہے۔

وانگ نے کہا کہ کمیونسٹ پارٹی آف چائنہ کی 20ویں قومی کانگریس نے اس بات پر زور دیا کہ چین غیرمتزلزل طور پر بیرونی دنیا کے لیے خود کو وسیع پیمانے پرکھولے گا اور جدیدیت کے چینی راستے کے ذریعے تمام شعبوں میں چینی قوم کی عظیم تجدید کو آگے بڑھائے گا۔

اقوام متحدہ(شِنہوا)اقوام متحدہ کے سیکرٹری جنرل انتونیو گوتریس نے تمام رکن ممالک سے اقوام متحدہ کے منشورخصوصاً قانون کی حکمرانی کے وژن اور اقدار کو برقرار رکھنے کا مطالبہ کیاہے۔

اقوام متحدہ سربراہ نے بین الاقوامی امن وسلامتی کو برقرار رکھنے میں قانون کی حکمرانی کو مضبوط بنانے کے حوالے سے سلامتی کونسل کے اجلاس میں اظہار خیال کرتے ہوئے کہا کہ سب سے پہلے اور سب سے اہم بات یہ ہے کہ وہ  تمام رکن ممالک پر اقوام متحدہ کے چارٹر اور انسانی حقوق کے عالمی اعلامیے کے وژن اور اقدار کو برقرار رکھنے اور بین الاقوامی قانون کی پاسداری کرنے کا مطالبہ کرتے ہیں۔

اس بات کا ذکر کرتے ہوئے کہ قانون کی حکمرانی اقوام متحدہ اورامن مشن کی بنیاد ہے اور یہ کہ قانون کی حکمرانی کی بنیاد اس پر ہے کہ تمام افراد ،سرکاری اور نجی ادارے بشمول خود ریاست قانون کے سامنے جوابدہ ہیں انہوں نے کہا کہ قانون کی حکمرانی کمزوروں کی حفاظت  کرتے ہوئے امتیازی سلوک، ہراساں کرنے اور دیگر زیادتیوں کو روکتی ہے۔

انہوں نے کہا کہ یہ نسل کشی سمیت  ظلم پر مبنی جرائم کے خلاف دفاع کی ہماری پہلی لائن ہے۔ یہ اداروں میں اعتماد پیدا اور تقویت دیتی ہے۔ یہ منصفانہ، جامع معیشتوں اور معاشروں کی حمایت کرتی ہےاور یہ بین الاقوامی تعاون اور کثیرالجہتی کی بنیاد ہے۔

بیجنگ(شِنہوا)چین کے نائب وزیراعظم لیو ہی عالمی اقتصادی فورم(ڈبلیو ای ایف) کے سالانہ اجلاس 2023ء میں شرکت کریں گے ۔ 

چین کی وزارت خارجہ کے ترجمان وانگ وین بن نے جمعہ کے روز اس بات کا اعلان کرتے ہوئے بتایا کہ چین کے نائب وزیراعظم لیو ہی سوئس حکومت اور عالمی اقتصادی فورم کے بانی و ایگزیکٹو چیئرمین کلاؤس شواب کی دعوت پر 15 سے 19 جنوری تک سوئٹزرلینڈ کا دورہ کریں گے۔

چین کے وزیراعظم لی کھ چھیانگ اسٹیٹ ایڈمنسٹریشن فار مارکیٹ ریگولیشن(ایس اے ایم آر) کے معائنہ کے دوران عملہ سے گفتگو کر رہے ہیں۔(شِنہوا)

شی چھانگ (شِنہوا) چین نے جنوب مغربی صوبہ سیچھوان کے شی چھانگ سیٹلائٹ لانچ مرکز سے ایک نیا سیٹلائٹ کامیابی سے خلا میں بھیج دیا۔

ٹیلی مواصلات سیٹلائٹ ایپ اسٹار۔ 6 ای کو لیکر جانے والے لانگ مارچ۔ 2 سی کیریئر راکٹ نے جمعہ کے روز قبل از سحر  2 بجکر 10 منٹ (بیجنگ وقت) پر اڑان بھری اور مقررہ مدار میں کامیا بی سے داخل ہوگیا۔

سیٹلائٹ بنیادی طور پر جنوب مشرقی ایشیا کے لئے اعلی درجے کی مواصلاتی خدمات کی فراہمی میں استعمال ہوگا۔

یہ لانگ مارچ کیریئر راکٹ سیریز کا 460 واں پرواز مشن تھا۔

چین کے وزیراعظم لی کھ چھیانگ اسٹیٹ ایڈمنسٹریشن فار مارکیٹ ریگولیشن(ایس اے ایم آر) کے معائنہ کے دوران ڈیٹا تجزیہ مرکز میں مارکیٹ اداروں کی ترقی کے رجحان بارے معلومات حاصل کر رہے ہیں۔(شِنہوا)

فویان (شِنہوا) چین کے سب سے چھوٹے نسلی اقلیتی گروہوں میں سے ایک ہی ژے آمدہ چینی قمری نئے سال کا خیرمقدم مختلف سرگرمیوں کے انعقاد کے ساتھ کرتے ہیں۔

چین ، شمال مشرقی صوبہ حئی لونگ جیانگ کے شہر فویان کی مشرقی جھیل پر ہی ژے آدمی تازہ شکار کردہ مچھلی دکھا رہا ہے ۔ (شِنہوا)

چین ، شمال مشرقی صوبہ حئی لونگ جیانگ کے شہر فویان کی مشرقی جھیل پر ہی ژے افراد تازہ شکار کردہ مچھلیاں صاف کرنے کی تیاری کررہے ہیں۔(شِنہوا)

چین ، شمال مشرقی صوبہ حئی لونگ جیانگ کے شہر فویان کے قصبے ووسو میں  ہی ژے نوجوانوں کا ایک گروپ ، ہی ژے کا روایتی کھیل ، ڈینگ گینگ کھیل رہا ہے ۔ (شِںہوا)

چین ، شمال مشرقی صوبہ حئی لونگ جیانگ کے شہر فویان کی مشرقی جھیل پر ہی ژے افراد مچھلیوں کا شکار کررہے ہیں ۔ (شِنہوا)

بیجنگ (شِنہوا) چین کی سالانہ غیر ملکی تجارت کی مالیت سال  2022 کے دوران  پہلی بار 400 کھرب یوآن (تقریباً 59 کھرب 40 ارب  امریکی ڈالر) تک پہنچ گئی ہے ۔

سرکاری اعداد و شمار  کے مطابق  اس کا سبب یہ ہے کہ ملک پیچیدہ اور سنگین ملکی اور بین الاقوامی حالات کے دوران  معاشی اور سماجی ترقی کے ساتھ وبائی مرض سے نمٹنے کے عمل  کو بہتر طور پر مربوط کرنے کے لیے کام کر رہا ہے۔

کسٹمز کی عمومی انتظامیہ  (جی ای سی )  نے جمعہ کو بتایا کہ اشیا  کی مجموعی  تجارت 420 کھرب 70 ارب یوآن تک پہنچ گئی جو گزشتہ سال کی نسبت 7.7 فیصد زیادہ ہے اور  جو کہ مسلسل 6 برسوں  سے دنیا میں سرفہرست ہے۔

برآمدات 10.5 فیصد اضافے کے ساتھ  239 کھرب 70 ارب یوآن ہو گئی اور درآمدات 4.3 فیصد بڑھ کر 181 کھرب  یوآن ہو گئیں۔

کسٹمز  کی عمومی انتظامیہ  کے ترجمان لیو ڈالیانگ نے کہا  ہے کہ چین کی غیر ملکی تجارت نے گزشتہ  سال پیمانے،  معیار اور کارکردگی  کے لحاظ  سے  کامیابیاں حاصل کی ہیں  جو کہ طلب، رسد اور توقعات کے پیش نظر ایک مشکل سے حاصل کیا گیا کارنامہ ہے۔

چین کی آسیان، یورپی یونین اور امریکہ کے ساتھ درآمدات اور برآمدات میں بالترتیب 15 فیصد، 5.6 فیصد اور 3.7 فیصد کا اضافہ ہوا۔

بیلٹ اینڈ روڈ کے ساتھ واقع ملکوں  کے ساتھ چین کی تجارت 19.4 فیصد بڑھ کر اس کی مجموعی  غیر ملکی تجارت کے  32.9 فیصد کے برابر  بن گئی ہے  جبکہ علاقائی جامع اقتصادی شراکت داری کے دیگر رکن ملکوں کے ساتھ تجارت میں 7.5 فیصد اضافہ ہوا۔

چین کے وزیراعظم لی کھ چھیانگ اسٹیٹ ایڈمنسٹریشن فار مارکیٹ ریگولیشن(ایس اے ایم آر) کے معائنہ کے دوران ایک سمپوزیم کی صدارت کر رہے ہیں۔(شِنہوا)

بیجنگ (شِنہوا) چین کے انسداد بدعنوانی  کے اعلیٰ ادارے کی جانب  سے جاری کردہ ایک اعلان میں کہا گیا ہے کہ  چین نےسال  2022 کے دوران 5 لاکھ 92 ہزارافراد کو تادیبی سزائیں دیں جن میں سے 53 صوبائی یا وزارتی سطح کے  اہلکار تھے ۔

کمیونسٹ پارٹی آف چائنہ (سی پی سی ) کے مرکزی کمیشن برائے نظم ونسق و معائنہ کاری  اور قومی نگران کمیشن  نے جمعہ کو بتایا کہ  چینی تادیبی انسپکٹرز نےسال  2022 کے دوران  نظم و ضبط کی خلاف ورزیوں کے مجموعی طور پر  5 لاکھ 96 کیسز کو نمٹایا ۔ان میں سے  مختلف سطح کے تقریباً 1 لاکھ 80 ہزار  اہلکاروں کو سزائیں دی گئیں۔

تادیبی حکام نے نظم و ضبط کی معمولی خلاف ورزی میں ملوث افراد کو آ گا ہی فراہم کرنے اور خبردار کرنے کی کوششیں بھی تیز کر دیں  ہیں جس میں گزشتہ سال تقریباً 12 لاکھ افراد شامل تھے۔

نئی دہلی(شِنہوا) بھارت کی مغربی ریاست مہاراشٹر میں ایک تیز رفتار بس اور سامان سے لدے ٹرک میں تصادم کے باعث کم از کم 10 افراد ہلاک اورمتعدد زخمی ہو گئے ہیں۔

حکام نے بتایا کہ حادثہ مہاراشٹر کے دارالحکومت ممبئی سے تقریباً 180 کلومیٹر شمال مشرق میں ضلع ناسک کے علاقہ سنار میں جمعہ کے روز پیش آیا۔

ایک پولیس اہلکار نے بتایا کہ آج صبح ناسک ۔ شرڈی ہائی وے پر واوی پٹھارے گاؤں کے قریب ایک بس سامان سے لدے ٹرک سے ٹکرا گئی، جس کے نتیجے میں  10 افراد ہلاک اور متعدد زخمی ہو گئے ہیں۔ زخمیوں کو فوری طور پر ہسپتال منتقل کر دیا گیا، جہاں چند کی حالت تشویشناک بتائی جاتی ہے۔

حکام کے مطابق مرنے والوں میں 7 خواتین اور2 بچے شامل ہیں۔

اطلاعات کے مطابق نجی لگژری بس ضلع تھانے کے علاقے عنبرناتھ سے روانہ ہو کر ضلع احمدنگر کے مذہبی قصبے شرڈی کی طرف جا رہی تھی۔

فوری طور پر حادثے کی وجوہات سے متعلق معلومات دستیاب نہیں ہو سکی ہیں۔

چین کے وزیراعظم لی کھ چھیانگ قومی دانشورانہ املاک انتظامیہ کا دورہ کر رہے ہیں۔(شِنہوا)

بیجنگ (شِنہوا) چین کے اعلیٰ پروکیوریٹو ریٹ نے کہا ہے کہ 2022 کے ابتدائی 11 ماہ کے دوران اجرت کی عدم ادائیگی بارے 1 ہزار 73 فوجداری مقدمات نمٹائے گئے جو گزشتہ برس کی نسبت 34.09 فیصد کم ہیں۔

سپر یم پیپلز پرو کیو ریٹو ریٹ  کے جاری کردہ اعداد و شمار کے مطابق جنوری سے نومبر 2022 کے دوران اس بارے کل 1136 افراد کے کیسز سے نمٹا گیا جو 2021 کی اسی مدت کے مقابلے میں 33.49 فیصد کم ہے۔

سپر یم پیپلز پرو کیو ریٹو ریٹ کے مطابق حالیہ برسوں میں اس قسم کے مسائل ختم کرنے اور کارکنوں میں ان کے حقوق کے تحفظ بارے شعور میں اضافہ کرنے کی تیز کوششوں کے سبب تارکین محںت کشوں کو اجرت کی عدم ادائیگی کا رجحان کم ہوا ہے۔

سپر یم پیپلز پرو کیو ریٹو ریٹ نے نجی شعبے میں ایک ٹھوس قانونی ماحول پیدا کرنے کے لئے اجرت کی عدم ادائیگی کے جرائم پر سخت سزا کا وعدہ کیا۔

کولمبو (شِںہوا) سری لنکا کے ایک وزیر مملکت نے کہا ہے کہ 2024  تک فوج کی تعداد 2 لاکھ 783 کی منظورشدہ تعداد سے کم کرکے 1 لاکھ 35 ہزار کردی جائے گی۔

وزیرمملکت برائے دفاع پرمیتھا بندرا ٹیناکون نے ایک اعلامیہ میں کہا کہ 2030 تک یہ تعداد مزید کم کرکے 1 لاکھ کردی جائے گی۔

ٹیناکون نے کہا کہ فوجی طاقت اور پائیدارمعاشی ترقی ایک سکے کے دو رخ ہیں۔فوجی اخراجات بالواسطہ حوصلہ افزائی کرتے اور قومی، انسانی سلامتی یقینی بناکر معاشی ترقی کی راہیں کھولتے ہیں۔

انہوں نے کہا کہ حکومت نے ملک کی قومی سلامتی کی ضروریات کے تحت مستقبل کے سیکیورٹی مشکلات سے نمٹنے کے لئے سال 2030 تک تکنیکی اور حکمت عملی کے لحاظ سے مضبوط اور متوازن دفاعی فورس قائم کرنے کا ایک اسٹریٹجک خاکہ تیار کیا ہے۔

بیجنگ (شِنہوا) شِنہوا نیوز ایجنسی کی جانب سے منعقد کی گئی ایک تقریب کے دوران سال 2022 کے بنیادی  سطح کے رول ماڈلز میں  ایوارڈز تقسیم کیے گئے ہیں۔

تقریب  میں جیتنے والے ایک گروپ اور ایک جوڑے پر مشتمل 8 افراد کو ان کے بے لوث کام کرنے یا ضرورت مندوں کی مدد کرنے پر اعزاز سے نوازا  گیا ۔

انعامات حاصل  کرنے والوں میں چین کے جنوب مغربی صوبہ سیچھوان میں ایک ایس ڈبلیو اے ٹی  افسر چھن شیاؤچھیانگ بھی شامل  تھے جنہوں نے ستمبر 2022 میں سیچھوان کی لوڈنگ کاؤنٹی میں 6.8 شدت کے زلزلے کے بعد ہنگامی امدادی کارروائیوں میں حصہ لیا۔ مسلسل 13 گھنٹے کام کرنے اور ملبے تلے  دبے ہوئے تین لوگوں کو بچانے کے بعد چھن کو معلوم ہوا کہ اس کے اپنے والد اور بہن زلزلے میں جان سے چلے  گئے ہیں۔ اپنے خاندان کے  لئے انتظامات کرنے کے تھوڑی  ہی دیر بعد چھن اپنی ریسکیو کی خدمات  جاری رکھنے کے لیے واپس چلے گئے ۔

دیگر جیتنے والوں میں ایک معذور شخص شامل ہے جس نے پانی میں گرنے والی ماں اور اس کی بیٹی کو بچانے کے لیے دریا میں چھلانگ لگا دی تھی ۔ اس کے علاوہ  ایک جوڑا  بھی ہے جس نے تقریباً 30 سال جنگل کے فارم کی حفاظت کے لیے وقف کیے۔ ان کے ساتھ ایک پراسیکیوٹر بھی ہے  جس نے اپنا فارغ وقت نوعمر افراد کے لیے رضاکارانہ قانونی خدمات کے لیے وقف کیا۔ 

اعزاز جیتنے والوں میں  بصارت سے محروم ایک دیہی ڈاکٹر بھی شامل تھے  جس نےاپنی  جسمانی معذوری  پر قابو پاتے ہوئے دیہی علاقوں میں بچوں کو علم  کی فراہمی کے لیے کوشش کیں ۔

رول ماڈلز کا انتخاب انٹرنیٹ صارفین اور ماہرین نے کیا تھا۔

یہ ایوارڈ پہلی مر تبہ 2010 میں لانچ کیا گیا اور رواں سال یہ اپنی نوعیت کا 13واں ایوارڈ ہے۔

انقرہ(شِنہوا) ترک استغاثہ نے سویڈن کے دارالحکومت سٹاک ہوم میں صدر رجب طیب ایردوآن کے خلاف احتجاج کی تحقیقات شروع کردی ہیں۔

نیم سرکاری انادولو ایجنسی کی رپورٹ کے مطابق یہ فیصلہ احتجاج کے خلاف ترک صدر کی جانب سے ملکی استغاثہ کے پاس فوجداری شکایت درج کرنے کے بعد کیا گیا ہے۔

ایردوآن کے وکیل حسین آیدین نے ٹویٹر پر کہا کہ انقرہ کے چیف پبلک پراسیکیوٹر کے دفتر میں ایک شکایت درج کرائی گئی ہے، جس میں مطالبہ کیا گیا ہے کہ صدرکے خلاف مجرمانہ اقدامات کرنے والوں کے خلاف تحقیقات شروع کی جائیں۔ انقرہ کا خیال ہے کہ ایردوآن کے خلاف حالیہ احتجاج سویڈن میں کالعدم کردستان ورکرز پارٹی (پی کے کے) اور شام کی کرد پیپلز پروٹیکشن یونٹس (وائی پی جی ) کے حامیوں کی طرف سے کی گئی ایک مجرمانہ اشتعال انگیزی ہے۔ 

ہانگ کانگ(شِنہوا) چین کے ہانگ کانگ خصوصی انتظامی علاقے (ایچ کے ایس اے آر) کی حکومت نے برطانوی حکومت کی طرف سےہانگ کانگ کے حوالے سے جنوری تا جون 2022 کی نام نہاد ششماہی رپورٹ میں"ایک ملک، دو نظام" اصول کے کامیاب  نفاذ کے حوالے سے  الزام تراشی اور بدنیتی پر مبنی  سیاسی حملوں کو سختی سے مسترد کردیاہے۔

ایچ کے ایس اے آر حکومت کے ایک ترجمان نے کہا کہ ایچ کے ایس اے آر عوامی جمہوریہ چین کا ایک ناقابل تنسیخ حصہ ہے،ترجمان نے  برطانیہ پر دوبارہ زور دیا کہ وہ بین الاقوامی قانون اور بین الاقوامی تعلقات کے بنیادی اصولوں کا احترام اور ایچ کے ایس اے آرکے معاملات میں مداخلت بند کرے۔ ترجمان نے کہا کہ ایچ کے ایس اے آر فعال طور پر وسیع تعلقات کو برقرار رکھتے ہوئے اپنے  بنیادی قانون کے مطابق مختلف ممالک اور خطوں کے ساتھ تعاون کو آسان بنا رہا ہے، جو "ایک ملک، دو نظام" کے باہمی احترام اورایسے اصول کے کامیاب نفاذ پرکسی پر الزام تراشی نہ کرنے اور نہ ہی ایچ کے ایس اے آر کے  معاملات میں مداخلت کے عزم پر مبنی ہے۔ ایچ کے ایس اے آر حکومت نے برطانوی حکومت کی طرف سے جاری کی گئی نام نہاد رپورٹ میں ہانگ کانگ کے تعلیمی نظام پر کی گئی الزام تراشی کو بھی سختی سے مسترد کردیا۔

ٹوکیو(شِنہوا)جاپانی استغاثہ نے سابق وزیراعظم شنزوایبے کے قتل میں ملوث مشتبہ شخص پر جمعہ کے روز فرد جرم عائد کر دی ہے۔

مقامی اخبار یومیوری شمبن کی خبر کے مطابق دفتر برائے ضلعی پبلک پراسکیوٹر نارا نے حملہ آور 42 سالہ ٹیٹسویا یاماگامی پر قتل کے الزام میں فرد جرم عائد کی ہے۔

رپورٹ میں کہا گیا کہ اس پر جاپان کے گن کنٹرول قوانین کی خلاف ورزی کا الزام بھی عائد کیا گیا ہے۔

یہ رسمی الزامات ٹیٹسویا یاماگامی کے 6 ماہ کی طویل نفسیاتی آزمائش سے گزرنے کے بعد سامنے آئے ہیں تاکہ یہ پتا لگایا جا سکے کہ آیا وہ اپنے اعمال کا مجرمانہ طور پر ذمہ دار ٹھہرائے جانے کیلئے ذہنی طور پر تندرست ہے یا نہیں ۔

ٹیٹسویا یاماگامی کو گزشتہ سال 8 جولائی کو ایوان بالا کے انتخابات سے صرف 2 دن قبل مغربی صوبے نارا میں مبینہ طور پر دیسی ساختہ بندوق سے 67 سالہ سابق وزیراعظم شنزوایبے کو تقریر کرتے ہوئے قریب سے 2 گولیاں مارنے کے بعد موقع پر ہی گرفتار کر لیا گیا تھا ۔

ژین یوآن (شِنہوا) چین کے صوبہ گوئی ژو میں دارالحکومت گوئی یانگ اور ٹورنگ شہر کی یوپھنگ ڈونگ خوداختیار کاؤنٹی کے درمیان "سست ٹرین" یا عام ٹرین کی جوڑی نمبر 5639 اور 5640 چلتی ہے۔

یہ ٹرینیں چھیان ڈونگ نان میاؤ اور ڈونگ خوداختیار پریفیکچر میں متعدد بستیوں سے گزرتی ہیں اور 337 کلومیٹر کے اس سفر کے ذریعے 100 سے زیادہ نسلی اقلیتی دیہات کو جوڑتی ہیں۔

آمدہ چینی قمری نئے سال کے لئے مقامی افراد کی تیاریوں میں آسانی کے لئے  حال ہی میں مسافروں بارے ٹرینوں پر ایک عارضی میلہ منعقد کیا گیا ہے تاکہ وہ جشن کے لئے خریداری کرسکیں۔

چین ، جنوب مغربی صوبہ گوئی ژو کے شہر گوئی یانگ میں گوئی یانگ ریلوے اسٹیشن پر ٹرین نمبر 5640 پر ایک فنکارہ ٹرین میں سوار ہونے جارہی ہے۔ (شِنہوا)

چین ، جنوب مغربی صوبہ گوئی ژو کے شہر کائے لی کے  کا ئے لی ریلوے اسٹیشن پر مسافر ٹرین نمبر 5640 پر سوار ہورہے ہیں۔ (شِنہوا)

چین ، جنوب مغربی صوبہ گوئی ژو کے شہر کائے لی کے کائے لی ریلوے اسٹیشن پر مسافر ٹرین نمبر 5640 پر سوار ہونے کے لئے قطار میں کھڑے ہیں۔ (شِنہوا)

چین، جنوب مغربی صوبہ گوئی ژو میں مسافر ٹرین نمبر 5640 میں نئے سال کی سجاوٹ منتخب کررہے ہیں ۔ (شِنہوا)

بیجنگ(شِنہوا) بیجنگ میں آمدہ موسم بہار میلہ کیلئے 4 ہزار سے زائد ثقافتی تقریبات کا انعقاد ہفتہ سے شروع ہو گا۔

بیجنگ میونسپل بیورو برائے ثقافت و سیاحت کے مطابق اس سلسلے میں غیر مادی ثقافتی ورثے کو پیش کرنے والی سرگرمیاں، فنون پر مبنی پرفارمنس اور نمائشیں ، ٹیمپل فیئر ، لالٹین فیئر، پھولوں کی نمائش اور مفت فلموں کی نمائش کا اہتمام کیا جائیگا۔

روایتی برانڈ کمپنیوں اور غیرمادی ثقافتی ورثے کے وارثان کی جانب سے ڈانس پرفارمنس ، انٹرایکٹو نمائشوں، نئے سال کی اشیاء کا تہوار اور دستکاری نمائشوں سمیت 46 تقریبات کا انعقاد کیا جائیگا۔

شہر کے 104 مقامات پر 244 ڈراموں کی مجموعی طور پر 1 ہزار 687 پرفارمنس بھی پیش کی جائیں گی۔

بہار میلہ یا چینی قمری سال نو رواں سال 22 جنوری سے شروع ہوگا ۔ اس کی تقریبات رواں سال 5 فروری کو منعقد ہونیوالے لالٹین فیسٹیول تک جاری رہیں گی۔

لاس اینجلس(شِنہوا) امریکی خلائی ادارے ناسا نے کہا ہے کہ 2022 میں زمین کا اوسط سطح کا درجہ حرارت 2015 کے برابررہا اور یہ ریکارڈ شدہ پانچواں گرم ترین سال تھا۔

ناسا کے موسمیاتی تجزیات کےمعروف مرکز،گوڈارڈ انسٹی ٹیوٹ فار اسپیس اسٹڈیز(جی آئی ایس ایس)کے سائنسدانوں کے مطابق، کرہ ارض کے طویل مدتی گرمی کے رجحان کو جاری رکھتے ہوئے، 2022 میں عالمی درجہ حرارت 1.6 ڈگری فارن ہائیٹ (0.89 ڈگری سینٹی گریڈ) ناسا کے بیس لائن پیریڈ (1951-1980) کے اوسط سے زیادہ تھا۔ ناسا کے ایڈمنسٹریٹر بل نیلسن نے کہا کہ گرمی کا یہ رجحان تشویشناک ہے۔ ہماری گرم آب و ہوا پہلے ہی مختلف پیٹرن اختیارکررہی ہے،جنگلاتی آگ تیز ہو رہی ہے۔سمندری طوفان زیادہ شدید ہو رہے ہیں؛ خشک سالی تباہی مچا رہی ہے اور سطح سمندر میں اضافہ ہورہا ہے۔انہوں نے کہا کہ ناساموسمیاتی تبدیلیوں سے نمٹنے کے لیے اپنا کردار ادا کرنے کے لیے ہمارے عزم کو مزید مضبوط کر رہا ہے۔ ہمارا ارتھ سسٹم آبزرویٹری ہمارے موسمیاتی ماڈلنگ، تجزیہ اور پیش گوئی کی مدد کے لیے جدید ترین ڈیٹا فراہم کرے گا تاکہ انسانیت کو سیارے کی بدلتی ہوئی آب و ہوا کا مقابلہ کرنے میں مدد ملے۔

ملتان میں ایک شخص گڑ تیار کررہا ہے۔(شِنہوا) 

چین کے شمال مشرقی ٹائیگر اینڈ لیوپرڈ قومی پارک کا ایک دلکش نظارہ ۔(شِنہوا)

چین ، شمال مغربی صوبہ چھنگ ہائی کے سان جیانگ یوآن قومی پارک میں دریائے زرد کے دہانے پر واقع ناگورنگ جھیل کا ایک منظر ۔(شِنہوا)

چین ، جنوب مشرقی صوبہ فوجیان کے وویی شان قومی پارک میں تبتی نسل کے بندروں کو دیکھا جاسکتا ہے۔(شِنہوا)

چین، شمال مغربی چھنگ ہائی کے علاقے ہو شیل میں تبتی نسل کے ہرن کو دیکھا جاسکتا ہے۔ (شِنہوا) 

بیجنگ (شِںہوا) چین کے مقامی ر یاستی کاروباری اداروں (ایس او ایز) کے اثاثوں میں 2022 کے دوران مسلسل اضافہ ہوا ہے۔

ریاستی کونسل کے سرکاری اثاثوں کے نگران اور انتظامی کمیشن نے ایک اجلاس میں کہا کہ نومبر 2022 کے اختتام تک مقامی ر یاستی کاروباری اداروں کے مجموعی اثاثے 2055 کھرب یوآن تک پہنچ گئے تھے جو گزشتہ برس کی نسبت 10.1 فیصد زائد ہے۔

مقامی ریاستی کاروباری اداروں کی مجموعی کاروباری آمدن میں 8.1 فیصد اضافہ ہوا ، جو 2022 کے ابتدائی 11 ماہ میں 337 کھرب یوآن تک پہنچ گیا۔

اجلاس میں بتایا گیا کہ چین نے اصلاحات سے ریاستی کاروباری اداروں کی مسابقت اور جدت طرازی کی صلاحیتوں کو فروغ دینے کے لئے 2020 میں 3 سالہ مہم شروع کی تھی ، جو 2022 میں اپنے اہداف کے حصول پر ختم ہوئی۔

چھونگ چھنگ (شِنہوا) میونسپل پیپلز کانگریس کے سالانہ اجلاس کے مطابق چین کے جنوب مغربی صنعتی پاور ہاؤس چھونگ چھنگ بلدیہ نے 2023 کے لیے 6 فیصد سے زیادہ مجموعی مقامی  پیداوار  کی شرح نمو کا ہدف مقرر کیا ہے۔

شہر کے میئر ہو ہنگ ہوا نے میونسپل  کے قانون ساز ادارے  میں جمعہ کو سرکاری  ورک رپورٹ  پیش کرتے ہوئے  کہا کہ اس  شہر کا مقصد مستقل  اثاثوں میں اپنی سرمایہ کاری، اشیائے صرف کی مجموعی  خوردہ فروخت اور کل درآمدی اور برآمدی حجم  میں بالترتیب 10 فیصد، 6 فیصد اور 3 فیصد اضافہ کرنا ہے۔ 

گزشتہ  پانچ برسوں کے دوران  چھونگ چھنگ کی مجموعی مقامی  پیداوارنے تقریباً 5.3 فیصد کا اوسط سالانہ جی ڈی پی اضافہ ریکارڈ کیا جو کہ سال  2022  کے دوران 29 کھرب  یوآن (تقریباً 430.96 ارب امریکی ڈالر) سے تجاوز  کرگیا  ہے ۔

ورک رپورٹ کے مطابق اس عرصہ کے دوران چھونگ چھنگ سبز ترقی کی راہ پر گامزن ہے۔  اچھی فضا کے معیار والے  دنوں کی تعداد  300 دن فی سال سے زیادہ  رہی ہے اور یہاں جنگل کی وسعت کی شرح 55 فیصد تک پہنچ گئی ہے۔

شنگھائی (شِنہوا) شنگھائی نے 2 کروڑ یوآن (تقریباً 30 لاکھ امریکی ڈالرز) کے فلم ٹکٹ کوپن جاری کر نے کا اعلان کیا ہے  جس کا اجرا جمعرات سے شروع کردیا گیا ہے۔

تشہیرکا مقصد زیادہ سے زیادہ فلم دیکھنے والوں کو سینما گھروں کی طرف راغب کرنا اور فلم مارکیٹ کی حوصلہ افزائی کرنا ہے۔

ایک مختص موبائل فون ایپلی کیشن کے ذریعے فلم ٹکٹ پر رہائشیوں کو فی ٹکٹ 20 یوآن کی رعایت ملے گی۔

تشہیر کے دوران شنگھائی بھر میں 330 سینما گھروں کا احاطہ کیا جائے گا اور اس سے 10 لاکھ صارفین کو فائدہ پہنچے گا۔

آئندہ 2023 کے موسم بہار تہوار میں متعدد فلمیں ریلیزکی جائیں گی جن میں 2019 کی سائنس فکشن بلاک بسٹر فلم 'دی ونڈرنگ ارتھ' کا پریکوئل 'دی ونڈرنگ ارتھ ٹو' اور 'فل ریور ریڈ' شامل ہیں، جس کے ہدایت کارمعروف چینی فلم ساز ژانگ یمو ہیں۔

بیجنگ (شِنہوا) چینی وزیر اعظم لی کھہ  چھیانگ نے پالیسیوں کے صحیح طور پر نفاذ کی کوششوں پر زور دیا ہے تاکہ مارکیٹ اداروں کو مشکلات پر قابو پانے میں مدد مل سکے اور ساتھ ہی  مارکیٹ کی احیائے نو اور عوامی تخلیقی صلاحیتوں کو فروغ دینے کے لیے اصلاحات کو مزید گہرا کیا جاسکے ۔

لی نے یہ بات  ریاستی انتظامیہ برائے مارکیٹ ضوابط (ایس اے ایم آر ) کے معائنہ کے دوران کہی جبکہ انہوں نے اسی روزایک سمپوزیم کی صدارت بھی کی۔

نیشنل انٹلیکچوئل پراپرٹی ایڈمنسٹریشن میں ایک رپورٹ  کی سماعت  کے دوران لی کے علم  میں یہ بات لائی گئی  کہ پیٹنٹ کے جائزے کے عمل میں درکار  اوسط وقت میں پانچ سال پہلے کے مقابلے میں ایک تہائی کمی آئی ہے۔

انہوں نے جدت کے اطلاق اور تبدیلی کے عمل  میں تیزی لانے  اور صنعت کو جدید خطوط پر استوار کرنے کے عمل  کو فروغ دینے کے لیے اعلیٰ معیار اور کارکردگی کی حامل  خدمات فراہم کرنے کی کوششوں پر زور دیا۔

ریاستی انتظامیہ برائے  مارکیٹ ضوابط کےاعدادوشمار بارے  ایک تجزیاتی مرکز میں لی کے علم میں یہ بات لائی گئی  کہ  چین کے مارکیٹ اداروں کی تعداد 10 برس  قبل کے  5 کروڑ50لاکھ سے بڑھ کر اب 16 کروڑ90لاکھ  ہو گئی ہے جبکہ خود روزگارکمانے والے  افراد کی تعداد11 کروڑ سے زیادہ ہے۔

 لی نے کہا کہ مارکیٹ اداروں کو فروغ دینے کے لیے کوششیں کی جانی چاہئیں۔

لی نے سمپوزیم میں کہا کہ چین نے حالیہ برسوں کے دوران  مارکیٹ کے اداروں کی نشوونما  اور حوصلہ افزائی کے لیے اصلاحات اور ترجیحی پالیسیوں کے امتزاج کا استعمال کیا ہے۔

 انہوں نے مزید کہا کہ ان اقدامات نے معیشت کی مستحکم کارگزاری  کو برقرار رکھنے میں کلیدی کردار ادا کیا ہے۔

رم اللہ(شِنہوا)فلسطین کے وزیراعظم محمد اشتیہ نے امریکی حکومت سے مطالبہ کیا ہے کہ وہ فلسطینیوں کیخلاف اٹھائے جانیوالے تمام یکطرفہ اسرائیلی اقدامات اور خلاف ورزیوں کو روکے۔

ایک سرکاری بیان کے مطابق محمد اشتیہ نے ان خیالات کا اظہار محکمہ خارجہ کی بیورو برائے مشرق قریب میں فلسطینی امور کیلئے امریکی نمائندہ خصوصی  ہادی عمر کے ساتھ ملاقات کے دوران کیا۔

دونوں فریقین نے وزیر اعظم بنجمن نیتن یاہو کی سربراہی میں نئی اسرائیلی حکومت کی طرف سے اقتدار سنبھالتے ہی فلسطینی عوام کے خلاف یکطرفہ سرگرمیوں پر تبادلہ خیال کیا۔

مغربی کنارے کے پناہ گزین کیمپ قلندیہ میں اسرائیلی حملے کے دوران مرنیوالے عونی اسلان کے جنازے کا ایک منظر۔(شِنہوا)

محمد اشتیہ نے ہادی عمر کو بتایا کہ امریکی حکومت کو اسرائیل کے یکطرفہ اقدامات اور دھمکیوں کو ختم کرنے کیلئے فوری اقدام کرنے کی ضرورت ہے جو قومی اتھارٹی کو نقصان پہنچاتے ہیں اور منظم طریقے سے فلسطینی ریاست کے قیام کے امکانات کو ختم کر رہے ہیں۔

بیجنگ (شِنہوا) چین نے اپنے عملہ بردار خلائی جہازوں شین ژو-14 اور شین ژو -15 پرموجود  فصلوں کے بیج اور جینیاتی طور پر تبدیل شدہ مائکروبیل کی تفصیلی فہرست جاری کی ہے۔

 چینی یونیورسٹیوں، تحقیقی اداروں اور گراس روٹ بریڈنگ اسٹیشن جیسے 112تعاون کنندہ اداروں کی جانب سے فراہم کردہ فصلوں کے 1ہزار 300 سے زیادہ بیج اورجینیاتی طور پر تبدیل شدہ مائکروبیل افزائشی تجربات کے لیے خلا میں لائے گئے ہیں۔ چین نے گزشتہ سال 5 جون کو اپنے خلائی اسٹیشن  کامبی نیشن پر عملہ بردارخلائی جہاز شین ژو-14  اور اس کے بعد 29 نومبر کو شین ژو -15 روانہ کیا تھا۔

دو مشنز پر موجود خلابازوں کو خلائی اسٹیشن میں پودوں کی افزائش کے تجربات کرنے کا کام سونپا گیا ہے۔ بیجوں میں چاول، گندم،  آلو، پھل اور سبزیاں، گھاس اور روایتی چینی ادویات میں استعمال ہونے والی جڑی بوٹیاں شامل ہیں۔ مختلف قسم کے پروبائیوٹکس تجرباتی فہرست میں شامل ہیں۔