فیصل آباد چیمبر آف کامرس اینڈانڈسٹری کے صدر ڈاکٹر خرم طارق نے چین پاکستان اقتصادی راہداری کے منصوبوں پر دوبارہ تیزی رفتاری سے کام شروع کرنے کا خیر مقدم کیا ہے اور کہاہے کہ چین کے نائب وزیر اعظم کے دورہ پاکستان کے سی پیک کے تحت جاری منصوبوں کی جلد تکمیل کو یقینی بنانے کے ساتھ ساتھ نئے منصوبو ںپر بھی کام شروع کرنے کی راہ ہموار ہو گی۔ انہوں نے کہا کہ چین اور پاکستان کے اقتصادی تعلقات ہر مشکل وقت میں برقرار رہے جس سے دونوں ملکوں کے درمیان قریبی اور برادرانہ تعلقات کا عملی اظہار ہوتا ہے۔ انہوں نے مزید کہا کہ 6ماہ کے وقفے کے بعد پاکستان میں چینی سفیر کا تقرر بھی ایک مثبت پیش رفت ہے جس سے باہمی اقتصادی روابط کو منصوبہ بنانے میں مد د ملے گی۔ ڈاکٹر خرم طارق نے چینی سفیر کا خیر مقدم کرتے ہوئے انہیں فیصل آباد چیمبر آنے کی بھی دعوت دی ہے تاکہ ایم تھری اور علامہ اقبال انڈسٹری اسٹیٹس میں چین کی طرف سے لگائے جانے والے صنعتی منصوبوں پر کام کی رفتار کو مزید تیز کیا جا سکے جبکہ مزید چینی سرمایہ کاری کیلئے بھی راہ ہموار کی جا سکے۔

کریڈٹ: انڈیپنڈنٹ نیوز پاکستان-آئی این پی

محکمہ زراعت کے مطابق دھان کے کاشتکارمنتقلی لاب کے 3 تا5 دن قبل ا ز اُگاؤ اثر رکھنے والی سفار ش کردہ جڑی بوٹی مار زہر شیکر بوتل کے ساتھ کھیت کے اندر پانی میں بکھیر دیں اور5 دن تک پانی کھڑا رکھیں۔کاشتکار اُگی ہوئی جڑی بوٹیوں کو تلف کرنے کے لئے منتقلی لاب کے ایک مہینہ کے اندر اندر سفار ش کردہ جڑی بوٹی مار زہروں کا سپرے کریں۔زنک کی کمی کی صورت میں زنک سلفیٹ33فیصد بحساب 6 تا 27 فیصد بحساب7.5 کلو گرام یا21 فیصدبحساب 10 کلو گرام فی ایکڑ لاب منتقلی کرنے کے دس دن تک ڈالیں۔کاشتکارمنتقلی لاب کے بعد 20 تا25 دن تک کھیت میں ایک تادو انچ پانی کھڑا رکھیں۔ا س کے بعد کھیت کو تر وتر حالت میں رکھیں تاکہ دانے دار ززہر ڈالتے وقت ایک تا ڈیرھ انچ پانی لازماً کھڑا ہو۔منتقلی کے بعد مختلف عوامل کی وجہ سے کچھ پودے مر جاتے ہیں یا پانی کے اُوپر تیر جاتے ہیںجس سے ناغے رہ جاتے ہیں۔اس لئے منتقلی لاب کے ہفتہ کے اند ر اندر جائزہ لیکر جلد ا ز جلد ناغے پُر کریں۔نائٹروجنی کھاد کی باقی ماندہ مقدار کا استعمال 15 اگست سے پہلے مکمل کرلیں اور کھاد ڈالتے وقت کھیت میں پانی کم سے کم کھڑا ہونا چاہیے۔ترجمان محکمہ زراعت پنجاب نے مزید کہا کہ دھان کی پتہ لپیٹ سنڈی کے حملہ کی صور ت میں نقصان کی معاشی حد 2 عدد حملہ شدہ/ لیپٹے ہوئے پتے فی پودا ہے۔اسی طرح تنے کی سنڈیوں کے حملے کی صور ت میں نقصان کی معاشی حد یعنی پودوں میں سوک کی شرح 5 فیصد ہوجائے تو محکمہ زراعت کے مقامی ماہرین کے مشورہ سے زہروں کا استعمال کریں۔بکائنی کے حملہ کی صورت میں متاثرہ پودوں کو اُکھاڑ کر تلف کردیں۔سفید پشتی اور بھورے تیلے کے متوقع حملہ سے کاشتکار ہوشیار رہیں۔یہ بات یاد رکھیں کہ دھان اور دیگر غذائی فصلات پر ہمیشہ سفارش کردہ محفوظ زہریں استعمال کریںتاکہ جنس میں زہر کی باقیات نہ پائی جائیں اور برآمد کرنے کی صورت میں یہ بین الاقوامی منڈی میں قابلِ قبول ہو سکے۔

کریڈٹ: انڈیپنڈنٹ نیوز پاکستان-آئی این پی

سٹرس کینکر کی بیماری ایک خاص بیکٹریا سے پھیلتی ہے اور دنیا میں جہاںکہیں بھی یہ بیماری حملہ آور ہوئی وہاں اس بیماری نے تیز ی سے باغات کو اپنی لپیٹ میں لے لیا اور دنیا کے کئی ممالک میں ہزاروں ایکڑ رقبہ پر باغات کو سٹرس کینکر کی بیماری کی وجہ سے تلف کرنا پڑا۔ ترشاوہ پھلو ں میں لیمن ، گریپ فروٹ اور مٹھا وغیرہ پر یہ بہت زیادہ حملہ آور ہوتی ہے تاہم دیگر ممالک میں سنگتروں اوربعض ترشاوہ پھلوں کی مخلوط اقسام بھی اس سے متاثر ہونے کی رپورٹس بھی ہیں۔ صوبہ پنجاب میں ترشاوہ پھلوں کے زیر ِ کاشت رقبہ تقریباً ساڑھے چار لا کھ ایکڑ ہے اورکل باغات میں سے تین لاکھ 35ہزار ایکڑ ز پر صرف کنو کے باغات ہیں ۔ کنوجو کہ دیگر ممالک کو برآمد کیا جاتا ہے اس لیے کنو کے پھل کوسٹرس کینکر کی بیماری سے بچانا بہت ضروری ہے لہذا باغبان سٹرس کینکر کی بیماری کے تدارک کیلئے ہنگامی بنیادوں پر سٹرس ریسرچ انسٹی ٹیوٹ کے زرعی سائنسدانوں کی ہد ایات پر عمل کریں تاکہ اندرون وبیرون ممالک باغبانوں کو اپنے پھل کی صحیح قیمت مل سکے۔سٹرس کینکرکی بیماری بیکٹریا سے پیدا ہوتی ہے اس بیماری سے پتے ، شاخیں، پھل اور پودے کے دوسرے حصے متاثر ہوتے ہیں ۔بیماری کے شدید حملہ کی صورت میں پودے کی صحت اور پیداواری صلاحیت متاثر ہوتی ہے۔ جس سے متاثرہ پھل کی ترسیل اور قیمت انتہائی کم ہوجاتی ہے۔ برصغیرمیں یہ بیماری 1942رپورٹ ہوئی اور اب یہ بیماری دنیا کے تمام ترشاوہ پھل پیدا کرنے والے ممالک میں پائی جاتی ہے ۔ سٹرس کینکر کی بیماری معاشی اہمیت کی حامل ہے۔ ترشاوہ باغات کی یہ بیماری دنیا میں دن بدن بڑھتی جارہی ہے۔سٹرس کینکر کی بیماری کی علامات میں پتوں، پتیوں، شاخوں، ٹہنیوں، کانٹے ، پھل کی ڈنڈی اور پھل کی جلد پر چھوٹے دائروں کی شکل کے بھورے رنگ کے دھبے نمودار ہوتے ہیں۔

بیماری کا شدید حملہ نئے پتوں شاخوں اور پھل پر ہوتا ہے۔ پتوں پر یہ بیماری چھوٹے ابھاروں کی صورت میں ظاہر ہوتی ہے۔یہ ابھارپہلے گہرے سبز رنگ کے ہوتے ہیں جو بعد میں گہرے بھورے اور سخت ہو جاتے ہیں اور چھونے سے ان کی سختی واضح محسوس ہوتی ہے وقت گزرنے کے ساتھ ساتھ ان بھورے رنگ کے نشانات کے اردگرد پیلے رنگ کے مردہ بافتوں کے دائرے بن جاتے ہیں۔ یہ نشان ایک سوئی کے نقطہ سے شروع ہو کر 10ملی میٹر تک بڑے ہوجاتے ہیں اور ان نشانات کے بڑھنے میں میزبان پودا، موافق موسمی حالات اور پودے کی عمر کا کردار اہم ہوتا ہے۔ بہت سے نشانات مل کر ایک بڑا قطعہ بنا لیتے ہیں جو پہلے سفید یا سرمئی مائل اور آخر کار کھردرا اور سخت ہونے کے بعد درمیان سے پھٹ جاتا ہے اور اُس سے لاکھوں کی تعداد میں سپورز نکل کر پھیل جاتے ہیں۔ پھولوں کی پتیوں اور پتے کی درمیانی شاخ پر بیماری کے حملہ کی وجہ سے نا پختہ پھل کا کیرا اور پتے گِر جاتے ہیں جس سے پودا بدشکل نظر آتا ہے۔ ٹہنیوں اور شاخوں پر بیماری کے اضافہ کی وجہ سے پودا مر جاتا ہے۔ بڑی شاخوں پر بیماری کے نشانات بے ترتیب ، کھردرے اور بہت واضح ہوتے ہیں۔ پھل کا اندرونی گودہ محفوظ رہتاہے۔ متاثرہ پھلوں کی مارکیٹ میں کوئی قدر نہیں ہوتی بیماری کے شدید حملہ کی صورت میں پھل کا کیرا ہوسکتا ہے اور پودے کی پیداواری صلاحیت کم ہونے کے علاوہ پودا سوکھ کر مر سکتا ہے۔جرثومہ متاثرہ پودوں، پتوں اور ٹہنیوں میں سرمائی خوابیدگی میں رہتا ہے متاثرہ پتوں میں بیماری کے جراثیم ایک سال تک پائے جاتے ہیں۔ شاخوں اور جلد میں یہ بیکٹریا 3 سے 6 سال تک بیماری پیدا کرنے کے قابل ہوتے ہیں۔

یہ جرثومہ بیماریوں سے پاک شدہ زمین میں 52دن تک جبکہ بیماری شدہ زمین میں 7 سے 9دن تک زندہ رہ سکتا ہے۔بیماری کاپھیلائو پتوں کے قدرتی سوراخوں یا زخموں کے ذریعے ہوتا ہے۔ بیماری پھیلنے کے لیے درجہ حرارت 20سے 35 ڈگری سینٹی گریڈتک جبکہ بارش کی کثرت اور میزبان پودے کی بیرونی سطح پر تقریباََ 20منٹ تک نمی کی موجودگی ضروری ہے۔جرثومہ پہلے پودے کی بیرونی سطح کو متاثر کرتا ہے۔ یہ جرثومہ یک خلوی اور راڈ کی شکل کے ہوتے ہیں اوریہ جرثومہ کچھ گھاس کی جڑوں میں بھی رہ سکتا ہے۔بیماری کے پھیلانے میں بارشوں کے دوران چلنے والی تیز ہوائیں، حشرات اور انسان اہم کردار ادا کرتے ہیں۔ اگر ہوا کی رفتار 18کلومیٹر فی گھنٹہ ہو تو اس بیماری کے جراثیم بہت تیزی سے میلو ں تک باغات کو اپنی لپیٹ میں لے لیتے ہیں۔ مز ید برآں سٹرس لیف مائنر خصوصاََ نئی پھوٹ کے اوپر حملہ آور ہوتے ہوئے پتوں پر جو گہری سر نگیں بنا دیتا ہے اُن میں سٹرس کینکر کا بیکٹریا اکٹھا ہو جاتا ہے اورمو افق حالات ملتے ہی یہ بہت زیادہ پھیل جاتا ہے بعد میں بیماری کا پھیلائو بیماری شدہ پانی کا پتوں، شاخوں اور پھل پر گرنے سے ہوتا ہے۔ایک جگہ سے دوسری جگہ پر بیماری بذریعہ متاثرہ پودوں ، متاثرہ پیوندی شاخوں، نرسری اسٹاک ، نرسری میں کام کرنے والے مزدوروں ، اوزاروں اور باغات میں استعمال ہونے والے آلات کے ذریعے پھیلتی ہے۔ اس کے علاوہ سٹرس فیکٹریوں کے متاثرہ فضلہ کو باغات کے نزدیک پھینکنے سے بھی اس بیماری کے پھیلنے کا احتمال بڑھ جاتا ہے۔پتے، تنے اور پھل جب پختہ ہوجائیں تو ان میں بیماری کے خلاف قوت مزاحمت آجاتی ہے۔بیماری کا حملہ نئی پھوٹ آنے پر سات دنوں کے دوران ہوتا ہے۔ پھول سے پھل بننے کے ابتدائی تین مہینوں میں پھل بیماری سے زیادہ متاثر ہوتا ہے۔ تین ماہ کے بعد ہونے والے انفیکشن میں بیماری کے چھوٹے اور نا مکمل نشانات بنتے ہیں۔ترشاوہ باغات کی مختلف اقسام میں ترشاوہ پھلوں کے کوڑھ کا حملہ گریب فروٹ اور کاغذی لا ئم پرزیادہ شدت سے ہوتا ہے ۔

تا ہم کنو کے نئے باغات پر بھی اس کا حملہ مشا ہدہ میں آیاہے ۔ چھوٹے پودوں پر بڑی عمر کے پودوں کے مقابلہ میں اس بیماری کا حملہ زیادہ ہے۔سٹرس کینکر کے تدارک کیلئے خلاف قوتِ مزاحمت رکھنے والی اقسام کاشت کریں۔بیماری سے متاثرہ پودوں کے بیماری سے متاثرہ حصوں کوکاٹ کر جلا دیں۔بیماری سے متاثرہ پودے کے پتے اکٹھے کرکے جلا دیں۔ایسی جگہ جہاں سے بیماری سے متاثرہ پودے نکالے گئے ہوں وہاں دوبارہ کم از کم دو سال بعد نئے پودے لگائیں۔نرسری میں موجود تمام دوسرے میزبان پودے تلف کردیے جائیں۔ نرسری اور باغات سے متعلقہ اوزاروں کو بیماری سے پاک رکھنے والے محلول سے دھویا جائے۔جب پودے گیلے یا نمدار ہوں تو ان میں کاشتی امور سے اجتناب کیا جائے۔لیف مائنر کا سپرے کے ذریعے تدارک کریں۔بیماری سے متاثرہ پودے کے پتوں اور شاخ تراشی کے وقت حفاظتی اقدامات کی سختی سے پابندی کی جائے۔ باغات میں سب سے پہلے سٹرس کینکر سے متاثرہ پتوں ، شاخوں اور پھل کو ختم کر یں اور اگرکسی جگہ پر اس بیماری کی شدت زیادہ نظر آئے پھر کم شدت والے بیماری کے حملہ کی طرف جاتے ہوئے پودوں کی کانٹ چھانٹ کریں اورٹہنیوں کو جلا دیا جائے ۔ کسی بھی تندرست پودے کے لیے بیماری سے متاثرہ پودوں کی شاخ تراشی کے دوران استعمال ہونے والی قینچی یا آری ہر گز استعمال نہ کریں۔مناسب کاشتی امور اور سپرے بیماری کے تدارک میں معاون ہوتا ہے ۔بیماری سے متاثرہ پودوں کے حصوں کی شاخ تراشی جرثومہ کی اثر ا نگیزی کو کمزور کردیتی ہے ۔کسی بھی قسم کی زہر استعمال کرنے سے پہلے محکمہ زراعت کے مقامی عملے سے مشورہ ضرور کریں۔

کریڈٹ: انڈیپنڈنٹ نیوز پاکستان-آئی این پی

فاؤنڈری تمام صنعتوں کی ماں ہے اور ہمیں اس کی برآمدی صلاحیت سے فائدہ اٹھانے کے لیے اسے نئی عالمی ٹیکنالوجیز کے مطابق اپ گریڈ کرنا چاہیے۔یہ بات فیصل آباد چیمبر آف کامرس اینڈ انڈسٹری کے سینئر نائب صدر ڈاکٹر سجاد ارشد نے پاکستان فونڈری ایسوسی ایشن اور فیصل آباد فونڈری اینڈ انجینئرنگ انڈسٹری اونرز ایسوسی ایشن کے تعاون سے سیمینار سے خطاب کرتے ہوئے کہی۔ انہوں نے فیصل آباد چیمبر کا تعارف پیش کرتے ہوئے بتایا کہ فیصل آباد چیمبر کے ممبروں کی تعداد 8300ہے جو180 مختلف سیکٹرز اور سب سیکٹرز سے تعلق رکھتے ہیں۔ انہوں نے بتایا کہ فیصل آباد ملک کی مجموعی برآمدات میں 65فیصد کا حصہ ڈال رہا ہے۔ انہوں نے کہا کہ صنعتی شعبے کا مستقبل براہ راست فاؤنڈری سیکٹر کے ساتھ جڑا ہوا ہے اور ہمیں اسے جدید سائنسی خطوط پر دوبارہ ترتیب دینے اور اپ گریڈ کرنے کی پوری کوشش کرنی چاہیے۔ اسی طرح حکومت کو بھی ٹیکس چھوٹ کے ساتھ خام مال کی مستقل اور قابل اعتماد فراہمی میں سہولت فراہم کرنے کے لیے اپنا کردار ادا کرنا چاہیے۔انہوں نے کہا کہ اس سیشن سے ہمارے فائونڈری ممبران کے علم میں اضافہ ہوگا اور اس سے ہمارے فائونڈری کے ممبران زیادہ سے زیادہ استفادہ حاصل کر سکیں گے۔ فائونڈری سیکٹر کے اشفاق اشرف نے کہا کہ آج کے سیشن میں ہمارے دونوں معزز مہمانوں مسٹراینڈری کو بانٹسیف اور مسٹر سرگئی کوکولن جن کا تعلق روس کی ایک ورلڈ وائڈ کمپنیFOSECO سے ہے ہمارے پاس تشریف لائے۔ اس سیمینار میں ممبران نے FOSECOکی ٹیم سے مختلف سوال بھی کئے اور معزز مہمانوں نے ممبران کے سوالوں کے جوابات دیتے ہوئے ان کو جدید ٹیکنالوجی کے مطابق کاسٹنگ کی صنعت کو مزید ترقی دینیکیلئے نفع بخش معلومات فراہم کیں اور مال کی ریجیکشن کو کم کرنے کے طریقے بتائے تاکہ کاسٹ آف پروڈکشن کم سے کم کی جائے۔ اس کے بعد ممبران نے اظہار خیال کرتے ہوئے کہا کہ اس طرح کے سیمینارز ڈھلائی سے منسلک انڈسٹری کیلئے بہت ہی فائدہ مند ثابت ہوں گے۔ اس موقع پر نائب صدر حاجی محمد اسلم بھلی، حاجی عبدالرئوف،انجینئر مجتبیٰ حسن، جلیل ملک، عبدالرزاق ، یوسف ملک ، ڈاکٹر عارف، محمد عابد، محمد شہباز، محمد اظہر، محمد ساحل، رانا احسان صدیق، ، مرزا زاہد، رانا محمد سعید ، ولید پرویز، زاہد علی اور محمد اشفاق بھی موجود تھے۔

کریڈٹ: انڈیپنڈنٹ نیوز پاکستان-آئی این پی

محکمہ زراعت نے کاشتکاروں کو کپاس کی فصل کو ملی بگ کے حملہ سے بچانے کے لیے پیسٹ سکاؤٹنگ کا عمل فوری طور پر شروع کرنے کی ہدایت کی ہے۔اسسٹنٹ ڈائریکٹر محکمہ زراعت توسیع فیصل آبادخالد اقبال نے کہا ہے کہ کپاس کے کھیتوں سے جڑی بوٹیوں کوترجیحی بنیادوں پر تلف کرنے کے لیے اقدامات کئے جائیں نیز ملی بگ کے حملہ سے متاثرہ پودوں کو فوری طور پر جڑ سے اکھاڑ کر پولی تھین بیگ میں ڈالنے کی بجائے انہیں زمین میں دفن کر دیا جائے تاکہ وہ مزید پودوں پر حملہ آور نہ ہو سکے۔انہوں نے کہا کہ ماہرین زراعت سمیت محکمہ زراعت کا فیلڈسٹاف کپاس کے کاشتکاروں کی مکمل رہنمائی کررہا ہے تاکہ ان کی فصلوں کو کیڑوں کے حملے سے بچا کر بہتر پیداوار کا حصول ممکن بنایا جا سکے۔ انہوں نے کہا کہ کاشتکار ماہرین زراعت کی سفارشات کو مد نظر رکھتے ہوئے نائٹروجن، فاسفورس، پوٹاش کا استعمال کریں۔ا نہوں نے کاشتکاروں کو ہدایت کی کہ وہ بوقت ضرورت ماہرین زراعت کو اپنے کھیتوں کا دورہ بھی کروائیں تاکہ وہ کپاس کی فصل بارے انہیں بہتر مشورے فراہم کر سکیں۔

کریڈٹ: انڈیپنڈنٹ نیوز پاکستان-آئی این پی

محکمہ زراعت نے کاشتکاروں کو مکئی کی اگیتی اقسام کی کاشت 20اگست تک مکمل کرنے کی ہدایت کی ہے۔ ڈپٹی ڈائریکٹرمحکمہ زراعت توسیع فیصل آبادچوہدری خالد محمودنے کہا ہے کہ کاشتکار مکئی کے لیے بھاری میرا ذرخیز زمین کا انتخاب کرتے ہوئے محکمہ زراعت کی منظور شدہ اقسام صدف، ساہیوال2002، اگیتی 2002، ہائبرڈ ایف ایچ 810وغیرہ کی کاشت بر وقت مکمل کر لیں تا کہ بہتر پیداوار کا حصول ممکن ہو سکے۔انہوں نے کہا کہ مکئی کی بہتر پیداوار کے لیے ڈرل کاشت کی صورت میں 12سے 15کلو گرام، کھیلیوں پر کاشت کی صورت میں 8سے 10کلو گرام اور بطور چارہ 40سے 50کلو گرام بیج فی ایکڑ استعمال کیا جائے۔ انہوں نے کہا کہ مکئی کی بہترین کاشت کے لیے 10سے15گڈ ے یا 4سے5ٹرالی گوبر کی گلی سڑی کھاد زمین کی تیاری کے وقت ضرور ڈالنی چاہیے۔انہوں نے کہا کہ آبپاش علاقوں میں فاسفورس اور پوٹاش کی ساری مقدار اور نائٹروجن کا پانچوا ں حصہ بوائی کے وقت ڈالیں جبکہ بارانی علاقوں میں ساری کھاد بوائی کے وقت ڈال دی جائے۔انہوں نے کہا کہ مکئی کی بھرپور پیداوار کے لیے جڑی بوٹیوں کی بروقت تلفی بھی ضروری ہے۔انہوں نے کہا کہ مکئی کی کاشت سنگل رو کاٹن ڈرل سے سوا2سے اڑھائی فٹ کے فاصلے پر کی جاسکتی ہے تاہم موسمی مکئی کے لیے پودوں کی تعداد 28سے 30ہزار فی ایکڑ اور کاشت ہمیشہ سیدھی قطاروں میں رکھنی چاہیے۔ انہوں نے کہاکہ مزید معلومات، مشاورت یا رہنمائی کے لیے محکمہ زراعت کے فیلڈ سٹاف سے بھی رابطہ کیا جا سکتا ہے۔

کریڈٹ: انڈیپنڈنٹ نیوز پاکستان-آئی این پی

شعبہ پلانٹ پروٹیکشن، پیسٹ وارننگ اینڈ کوالٹی کنٹرول آف پیسٹی سائیڈزمحکمہ زراعت فیصل آباد کے ڈپٹی ڈائریکٹرڈاکٹر عامر رسول نے بتایاکہ پاکستان میں زرعی ادویات کا 93.34فیصدحصہ کیڑے مارنے کیلئے استعمال ہوتاہے اورفصلات کی چھپی دشمن جڑی بوٹیوں کی تلفی کیلئے صرف.3 4فیصد ادویات استعمال کی جاتی ہیں جبکہ عالم اقوام میں جڑی بوٹی مار ادویات کی فروخت کا تناسب 45.3فیصد تک ہے۔انہوں نے بتایا کہ جڑی بوٹیاں کیڑے مکوڑوں سے زیادہ خطر ناک ہیں جو فصلوں سے خوراک، پانی، روشنی چھین کر ان کی پیداواری صلاحیت کو بری طرح متاثر کرتی ہیں۔ انہوں نے بتایاکہ عالم اقوام میں زرعی ادویات کی فروخت میں جڑی بوٹی مار ادویات کی فروخت کا حصہ سب سے زیادہ یعنی 45.3فیصد تک ہے جبکہ کیڑے مار ادویات 28.8، پھپھوندی کش ادویات 20.9اور دیگر ادویات 6.1فیصد کے تناسب سے استعمال کی جاتی ہیں۔انہوں نے بتایاکہ اس کے برعکس یہاں پر کیڑے مار ادویات 93.3فیصد، جڑی بوٹیاں تلف کرنے والی ادویات4.3فیصد اور پھپھوندی کش ادویات 2.3فیصد کے تناسب سے استعمال کی جاتی ہیں۔ انہوں نے کہاکہ چارہ جات کی فصلوں میں جڑی بوٹیوں کے موجود ہونے کو اتنی اہمیت نہیں دی جاتی کیونکہ تقریباً ہر قسم کی جڑی بوٹی بطور چارہ استعمال ہو جاتی ہے لیکن دیگرفصلات پر جڑی بوٹیاں بہت زیادہ منفی اثرات ڈالتی ہیں۔ انہوں نے کاشتکاروں سے اپیل کی کہ وہ ماہرین زراعت اور محکمہ زراعت کے فیلڈ سٹاف کی مشاورت سے جڑی بوٹیوں کے تدارک کیلئے بھی ضروری اقدامات یقینی بنائیں۔

کریڈٹ: انڈیپنڈنٹ نیوز پاکستان-آئی این پی

پاکستان کسان بورڈ کے مرکزی رہنما میاں ریحان الحق نے کہا ہے کہ ملک کی 58فیصد آبادی کو اس وقت نیوٹریشن سے بھر پور غذا میسر نہیں، آبادی کی شرح میں زبردست اضافہ ہو رہاہے جس کے باعث یہ 20برسوں میں بڑھ کر دو گنا ہو جائے گی، تیزی سے بڑھتی آبادی کی غذائی ضروریات پو ری کرنے اور فوڈ سکیورٹی کے چیلنجزسے نمٹنے کے لئے فوری اقدامات کرناہوں گے۔ایک ملاقات کے دوران انہوں نے بتایاکہ زرعی شعبے میں سرمایہ کاری سے پوری معیشت آگے بڑھ سکتی ہے جس سے دیہی ترقی اور بیروزگاری ختم کرنے کی کوششیں ثمر آور ثابت ہوسکتی ہیں۔ انہوں نے کہاکہ سائنس اینڈ ٹیکنالوجی کو بنی نوع انسان کی بہتری کے لیے بروئے کار لانے کی اشد ضرورت ہے کیونکہ صرف اسی اقدام سے ہی مستقبل کے چیلنجز سے نمٹا جا سکتا ہے۔ انہوں نے کہاکہ جنیاتی فصلات مستقبل میں بہترین غذائی پیداوار کی ضامن ہو سکتی ہیں۔

کریڈٹ: انڈیپنڈنٹ نیوز پاکستان-آئی این پی

پنجاب میں جانوروں و مویشیوں کی تعداد میں سالانہ 6 فیصد سے زیادہ کا اضافہ ہونے لگا ہے جبکہ رواں سال کے دوران صوبہ بھر میں مویشیوں و جانوروں کی تعداد8کروڑ سے بھی تجاوز کر گئی ہے۔ڈویژنل ڈائریکٹر محکمہ لائیو سٹاک وڈیری ڈویلپمنٹ فیصل آباد ڈاکٹر حیدر علی خان نے بتایا کہ پنجاب میں پاکستان کے چارہ جات کے کل رقبہ کے 80فیصد یعنی 48 لاکھ ایکڑ رقبہ پر چارہ جات کاشت ہوتے ہیں نیزربیع کے چاروں کا رقبہ ساڑھے25لاکھ ایکڑ سے زائد ہے۔انہوں نے چارہ جات کی پیداوار میں اضافہ کیلئے کاشتکاروں کو زرعی ماہرین کی سفارشات پر عمل کرنے کی بھی ہدایت کی۔

کریڈٹ: انڈیپنڈنٹ نیوز پاکستان-آئی این پی

فیصل آباد چیمبر آف کامرس اینڈانڈسٹری کے صدر ڈاکٹر خرم طارق نے کہا کہ ملائیشیا کی طرز پرافرادی قوت میں سرمایہ کاری کرکے پائیدار معاشی ترقی کے اہداف حاصل کرنے میں مدد مل سکتی ہے جبکہ اس ضمن میں ملائیشیا بھی پاکستان کی بھرپور معاونت کر سکتا ہے۔ انہوں نے بتایا کہ پاکستان اور ملائیشیا کے درمیان کاروباری و تجارتی روابط کے فروغ کے امکانات کے جائزہ کے سلسلہ میں انہوں نے گزشتہ روز ملائیشیا کے ہائی کمشنر محمد اظہر مزلان سے تفصیلی ملاقات کی اور انہیں فیصل آباد کی معاشی قوت کے بارے میں آگاہ کرنے سمیت انہیں فیصل آباد کاباضابطہ دورہ کرنے کی دعوت دی تاکہ وہ علامہ اقبال اور ایم تھری انڈسٹریل سٹیٹس میں ملائیشیا کی سرمایہ کاری کا جائزہ لے سکیں۔انہوں نے بتایا کہ اس موقع پرملائیشین ہائی کمشنر محمد اظہر مزلان کا کہنا تھا کہ ملائیشیا میں سرمایہ کاری کے وسیع امکانات موجود ہیں جبکہ اس ملک میں سرمایہ کاری سے آسیان بلاک کے 15ملکوں کی وسیع مارکیٹ تک رسائی حاصل کی جا سکتی ہے۔ان کا کہنا تھا کہ ملائیشیا تیزی سے ہائی انکم اکانومی کی طرف سے بڑھ رہا ہے اور اس کے فوائد ملائیشیا کے عوام کو بھی مل رہے ہیں۔انہوں نے بتایا کہ ملائیشیا کی حکومت نے افرادی قوت میں زبردست سرمایہ کاری کی ہے جس سے پائیدار معاشی ترقی کے اہداف کو حاصل کرنے میں مدد مل رہی ہے۔ آسیان کے حوالے سے انہوں نے کہا کہ دنیا کی 39فیصد آبادی اس معاشی بلاک سے وابستہ ہے جس سے پاکستانی سرمایہ کاروں اور برآمد کنندگان کو بھی فائدہ اٹھانا چاہیے۔ انہوں نے یقین دلایا کہ وہ دونوں ملکوں کے تاجروں کے درمیان براہ راست رابطوں کی حوصلہ افزائی کریں گے۔

کریڈٹ: انڈیپنڈنٹ نیوز پاکستان-آئی این پی

استعمال شدہ کپڑوں کی درآمد میں جون 2023 کے دوران سالانہ بنیاد پر 4.4 فیصد کمی ریکارڈ کی گئی۔ادارہ برائے شماریات کیاعدادوشمار کے مطابق جون 2022 کے مقابلے میں جون 2023 کے دوران استعمال شدہ کپڑوں کی درآمد میں 4.4 فیصد کمی ہوئی،جون 2022 کے دوران 7.3 ارب روپے کے استعمال شدہ کپڑے درآمد کیے گئیجبکہ جون 2023 کے دوران درآمدات کا حجم 6.9 ارب روپے رہا۔ اس طرح استعمال شدہ کپڑوں کی درآمد میں سالانہ بنیاد پر 4.4 فیصد کمی ریکارڈ کی گئی۔

کریڈٹ: انڈیپنڈنٹ نیوز پاکستان-آئی این پی

ملزمہ ثومیہ عاصم کے ہاتھوں تشدد کی شکارہونے والی رضوانہ کی بس اسٹینڈ پر لانے کی سی سی ٹی وی سامنے آگئی۔ سی سی ٹی وی فوٹیجز کے مطابق رضوانہ کوبس اسٹینڈ پروالدہ اپنے ساتھ لیتی ہے۔جس گاڑی میں رضوانہ کو لایا گیا وہ گاڑی بس اڈے پرہی رکتی ہے۔سی سی ٹی وی فوٹیجز کے مطابق رضوانہ کو بس اسٹینڈ پروالدہ اپنی تحویل میں لیتی ہے۔سی سی ٹی وی فوٹیج کے مطابق رات 8 بج کر 9 منٹ پر گاڑی نجی بس اسٹینڈ پر پہنچتی ہے ،8 بج کر 9 منٹ پرملازمہ رضوانہ کی والدہ بس اسٹینڈ پر موجود نظرآتی ہیں۔ سی سی ٹی وی کے مطابق رضوانہ کی والدہ شمیم کے کہنے پربس کوبینچ کے قریب لایا جاتا ہے،کم عمربچی کوایک شخص اٹھا کرگاڑی میں سوار کراتا ہے،جس گاڑی میں رضوانہ کو لایا گیا وہ گاڑی بس اڈے پرہی رکتی ہے،بچی کی والدہ شمیم اسی گاڑی میں بیٹھتی ہیں پھر10 منٹ بعد گاڑی سے باہر نکلتی ہے۔ 1 گھنٹہ 37 منٹ کے بعد رضوانہ اور اس کی والدہ شمیم بس اسٹینڈ سے روانہ ہوتی ہیں بس اسٹینڈ موجودگی کے دوران کم عمر ملازمہ کو بیٹھے دیکھا جاسکتا ہے، سی سی ٹی وی ایف آئی آرکے متن کے مطابق کمسن ملازمہ کی والدہ بیٹی کو لینے جج کے گھر گئی تھی۔

کریڈٹ: انڈیپنڈنٹ نیوز پاکستان-آئی این پی

وزیراعظم شہبازشریف نے میجر طفیل محمد شہید نشانِ حیدر کے یوم شہادت پر انہیں خراج عقیدت پیش کیا ہے۔ سماجی رابطے کی ویب سائٹ ایکس پر اپنے پیغام میں شہبازشریف نے کہا کہ میجر طفیل محمد شہید نے اپنی شجاعت و بہادری سے فرض کی انجام دہی کی لازوال داستان رقم کی اور وطن کی حفاظت کیلئے اپنی جان کی پرواہ بھی نہیں کی۔ انہوں نے کہا کہ پوری پاکستانی قوم میجر طفیل محمد شہید کی اس قربانی پر انہیں خراجِ عقیدت پیش کرتی ہے، پاکستانی قوم اپنے شہدا کی قربانیاں کبھی فراموش نہیں کرے گی۔ وزیرِ اعظم کا کہنا تھا کہ پاکستانی قوم کو وطن کی سلامتی کی اپنے خون سے آبیاری کرنے والے شہدا پر فخر ہے۔

کریڈٹ: انڈیپنڈنٹ نیوز پاکستان-آئی این پی

بھارت میں قید حریت رہنما یاسین ملک کی رہائی کیلئے اہلیہ مشال ملک اور ان کی بیٹی رضیہ سلطانہ نے اقوام متحدہ میں قرارداد جمع کرا دی۔تفصیلات کے مطابق حریت رہنما یاسین ملک کی رہائی کیلئے ان کی اہلیہ اور بیٹی مظفر آباد پہنچ گئیں، رضیہ سلطانہ نے اقوام متحدہ میں قرارداد جمع کرائی، جس میں اقوام متحدہ سے یاسین ملک کو انصاف دلانے کیلئے کردار ادا کرنے کا مطالبہ کیا گیا ہے۔ رضیہ سلطانہ اپنی والدہ مشال ملک کے ہمراہ مظفر آباد پہنچیں، یاسین ملک سے اظہار یک جہتی کیلئے لوگوں کی کثیر تعداد بھی موجود تھی، لوگوں نے یاسین ملک کو رہا کرو کے نعرے لگائے۔ مشال ملک نے کہا کہ مودی انتخابات جیتنے کیلئے کچھ بھی کر سکتا ہے، یاسین ملک کی بیٹی رضیہ سلطانہ نے کہا میں اپنے بابا سے ملنا چاہتی ہوں، ان کے ساتھ کھیلنا چاہتی ہوں، سب ان کے لیے آواز اٹھائیں۔ اس موقع پر میڈیا سے گفتگو کرتے ہوئے وزیر خزانہ آزاد کشمیر عبدالماجد خان نے کہا کہ رضیہ سلطانہ نے اقوام متحدہ میں ایک اور قرار داد جمع کرائی ہے، مقبوضہ کشمیر میں کوئی انسانی حقوق نہیں ہیں، بھارت کا چہرہ مزید بدنما اور بد کردار ہو چکا ہے، مودی نے گجرات میں جو کیا وہی کشمیر میں بھی کرنا چاہتا ہے، دنیا کو چاہیے کہ رضیہ سلطانہ کی آواز سنے۔ رکن آزاد کشمیر اسمبلی پیر محمد مظہر نے کہا کہ کشمیری عوام اپنے خود ارادیت کے وعدے کی تکمیل چاہتے ہیں، کشمیریوں کی تین نسلیں وعدے کی تکمیل کا انتظار کر رہی ہیں، بھارت میں آر ایس ایس کے غنڈے علاقے خالی کرا رہے ہیں۔

کریڈٹ: انڈیپنڈنٹ نیوز پاکستان-آئی این پی

الیکشن کمیشن میں پاکستان تحریک انصاف ممنوعہ فنڈنگ ضبطگی کیس کی سماعت 22 اگست تک ملتوی کردی گئی، پی ٹی آئی نے ضمنی جواب الیکشن کمیشن میں جمع کرادیا۔ الیکشن کمیشن نے پی ٹی آئی کا مزید جواب جمع کرانے کے حق پر فیصلہ محفوظ کرلیا۔ چیف الیکشن کمشنر کی زیر صدارت تین رکنی کمیشن نے پاکستان تحریک انصاف ممنوعہ فنڈنگ ضبطگی کیس کی سماعت کی، پی ٹی آئی کے معاون وکیل نوید انجم الیکشن کمیشن میں پیش ہوئے اور ضمنی جواب جمع کرایا۔ معاون وکیل نے کہا کہ 9 مئی کے بعد پی ٹی آئی کا ریکارڈ غائب کردیا گیا۔ چیف الیکشن کمشنر نے پوچھا کہ کتنے ضمنی جواب جمع کرائیں گے؟۔ معاون وکیل نے کہا کہ موجودہ صورتحال کے باعث ہم مجبور ہیں۔ چیف الیکشن کمشنر نے کہا کہ کیا ہم پھر آپ کا جواب جمع کرانے کا حق ختم کردیں؟۔ چیف الیکشن کمشنر کا کہنا ہے کہ گزشتہ سماعت پر جواب جمع کرانے کیلئے حتمی وقت دیا گیا تھا، اس کیس میں پہلے متعدد مرتبہ جواب کیلئے موقع دے چکے ہیں۔ پی ٹی آئی کے معاون وکیل نے بتایا کہ انور منصور شدید بیمار ہیں اس لئے پیش نہیں ہوسکے، حالات کے باعث جواب جمع کرانے میں تاخیر ہورہی ہے۔ چیف الیکشن کمشنر نے کہا کہ آخری موقع کا مطلب آخری موقع ہی ہوتا ہے، الیکشن کمیشن گزشتہ سماعت کے آرڈر پر کیا کرے؟، عام انتخابات سے قبل کمیشن تمام کیسز کو جلد از جلد نمٹانا چاہتا ہے، آپکا جواب جمع کرانے کیلئے بھی 8 سالہ پروگرام لگ رہا ہے۔ معاون وکیل نے کہا کہ ہمارے دفاتر پر دھاوے بولے گئے، سارا ریکارڈ اٹھا کر لے گئے ہیں۔ چیف الیکشن کمشنر نے کہا کہ انور منصور نے آج سے قبل اپنے تمام وعدے پورے کئے، اس کیس میں مزید کارروائی اسلام آباد ہائیکورٹ کی روشنی میں کریں گے۔ الیکشن کمیشن نے پی ٹی آئی کا مزید جواب جمع کرانیکے حق پرفیصلہ محفوظ کرلیا۔ چیف الیکشن کمشنر نے کہا کہ آئندہ سماعت سے قبل محفوظ فیصلے پر آرڈر جاری کریں گے۔ کیس کی سماعت 22 اگست تک ملتوی کردی گئی۔

کریڈٹ: انڈیپنڈنٹ نیوز پاکستان-آئی این پی

ہربنس پورہ کے علاقے قلندرپورہ میں گورنمنٹ گرلز ہائی اسکول کے برآمدے کی خستہ ہال چھت گرگئی۔ خوش قسمتی سے یہ واقعہ موسم گرما کی تعطیلات کے دوران پیش آیا اور اسی وجہ سے کوئی جانی نقصان نہیں ہوا۔ محکمہ تعلیم کے ذرائع کے مطابق گورنمنٹ گرلز ہائی اسکول قلندرپورہ کی 2 منزلہ عمارت کے برآمدے کی خستہ ہال چھت کا کچھ حصہ اچانک گرگیا۔ محکمہ تعلیم کے ذرائع نے تصدیق کی کہ اس حادثے میں کسی قسم کا نقصان نہیں ہوا البتہ برآمدے کی چھت کی مرمت کا کام جلد کرادیا جائے گا۔

کریڈٹ: انڈیپنڈنٹ نیوز پاکستان-آئی این پی

نیب لاہور کے انٹیلی جینس ونگ نے کارروائی کرتے ہوئے 2 جعلی نیب افسران کو گرفتار کرلیا۔ ترجمان نیب لاہورکے مطابق گرفتار ملزمان میں بلاول ہارون اور اکمل شامل ہیں، ملزمان کے خلاف ڈی جی نیب لاہور کی کھلی کچہری میں موصول ہونیوالی شکایت پرکارروائی کی گئی۔ ترجمان کے مطابق ملزمان لوگوں کو ان کے کام کروانے کا جھانسہ دے کر رقم بٹورتے تھے، گرفتار ملزمان سے حساس اداروں نے جعلی مہریں، لیٹرپیڈز، جعلی سروس کارڈز اور متاثرین سے بٹوری گئی رقم برآمد کرلی۔ خیال رہے اس سے قبل بھی جعلی نیب افسران کو گرفتار کیا جاچکا ہے۔

کریڈٹ: انڈیپنڈنٹ نیوز پاکستان-آئی این پی

پاکستان تحریک انصاف کے رہنما شاہ محمود قریشی نے کہا ہے کہ تمام اداروں سے درخواست ہے ملک کا سوچیں۔ شاہ محمود قریشی نے میڈیا سے گفتگو میں کہا کہ ملک کو مایوسی اور معاشی بحران سے نکالنے کا واحد راستہ نئے اور شفاف انتخابات ہیں۔الیکشن کے حوالے سے سپریم کورٹ کا تفصیلی فیصلہ موجود ہے۔ تمام اداروں سے درخواست ہے ملک کا سوچیں۔ رہنما پی ٹی آئی کا مزید کہنا تھا کہ نگراں حکومت کے حوالے سے ہم سے کوئی رابطہ نہیں کیا گیا۔ چیئرمین پی ٹی آئی کے حوالے سے جو فیصلہ آیا اس پر بہت تحفظات ہیں۔ اس فیصلے کے معطل ہونے کے امکان موجود ہیں۔ ہم سمجھتے ہیں فیصلے کے خلاف اپیل میں انصاف ملے گا۔شاہ محمود قریشی نے کہا کہ ہم نے تمام سیاسی معاملات پر نظر رکھنی ہے اور سب نے مل کر فیصلہ کرنا ہے۔ مردم شماری کے رزلٹ جو مئی میں آ چکے تھے تو تمام کام کیوں نہیں کیا۔ کیا یہ سب الیکشن کو ملتوی کرنے کی حکمت عملی تو نہیں ہے۔اسمبلیاں 9 تاریخ کو تحلیل ہو رہی ہیں۔

کریڈٹ: انڈیپنڈنٹ نیوز پاکستان-آئی این پی

وفاقی وزیر داخلہ و رہنما مسلم لیگ(ن)رانا ثنا اللہ نے کہا ہے کہ نگران وزیراعظم کے حوالے سے ابھی مشاورت جاری ہے، امید ہے آج شام یا کل تک نگران وزیراعظم کا نام فائنل ہو جائے گا۔ منگل کو اپنے ایک بیان میں وزیر داخلہ رانا ثنا اللہ کا کہنا تھا کہ نگران سیٹ اپ آئینی تقاضے کو پورا کرتے ہوئے حلقہ بندیاں کروائے گا، حلقہ بندی میں تقریبا 120 دن لگتے ہیں، اس میں کوئی کئی ماہ والی بات نہیں، جیسے ہی حلقہ بندی کا آئینی تقاضا مکمل ہوگا تو الیکشن ہوں گے، جہاں تک حفیظ شیخ یا دوسرے ناموں والا معاملہ ہے اس پر بات چیت ہو رہی ہے، ابھی تک کوئی نام فائنل نہیں ہوا۔ انہوں نے کہا کہ دہشتگردوں سے مذاکرات نہ کرنے کی پالیسی آج کی نہیں پہلے کی ہے، پچھلے سال جو دہشتگردوں سے مذاکرات کی بات ہوئی اس کے کوئی حوصلہ افزا نتائج نہیں نکلے، امن و امان کی صورتحال ایک صوبے میں ایسی ہے کہ توجہ دینے کی ضرورت ہے، الیکشن کے دوران کسی حادثے کی توقع ہو سکتی ہے، آج سے کچھ دن قبل سیاسی جلسے میں ایک بہت بڑا حادثہ ہوچکا ہے۔ وزیر داخلہ کا کہنا تھا کہ الیکشن اس وجہ سے آگے نہیں جائیں گے یا ملتوی نہیں ہوں گے، نگران حکومت اور سکیورٹی ادارے اس کو مینج کریں گے کہ الیکشن بروقت ہوں، باقی معاملات بھی آئین و قانون کے مطابق آگے بڑھیں۔ انہوں نے کہا کہ آرمی چیف کا افغانستان کے حوالے سے پیغام سخت بیان نہیں ہے، آرمی چیف کا بڑا مدلل اور حالات کے مطابق بالکل صحیح جواب ہے، پوری قوم آرمی چیف کے جواب کے ساتھ کھڑی ہے، ہمارے امن و امان میں مداخلت ہو رہی ہے، ہمارے امن و امان میں ہمسایہ ملک کی ایما پر دہشتگردی ہو رہی ہے، ایک ہمسایہ ملک سے لوگ دہشتگردی کر رہے ہیں یہ کسی صورت قابل قبول نہیں۔ رانا ثنا اللہ کا مزید کہنا تھا کہ دہشتگردی کے خلاف زیرو ٹالرنس ہے، مسلح افواج، ہمارے جوان شہادتیں قبول کر رہے ہیں، دہشتگردی کو کسی صورت برداشت نہیں کیا جائے گا۔

کریڈٹ: انڈیپنڈنٹ نیوز پاکستان-آئی این پی

لاہور میں شاطر شوہر نے بیوی کو قتل کیا اور خود مقدمہ درج کروا کے پولیس کو ایک سال تک بے قوف بناتا رہا، مقتولہ کے موبائل فون کا استعمال کرکے ملزم نے چالاکی سے قتل کو چھپایا۔ لاہور میں شاطر ملزم نے اپنی بیوی دوسری بیوی کو 4 کروڑ روپے کی جائیداد ہتھیانے کیلئے ہتھوڑی کے وار کرکے قتل کیا اور لاش بہاولنگر کے قریب دریا برد کردی۔ نائلہ کو قتل کرکے 56 سالہ ملزم شاہد اپنی ہی بیوی کے اغوا کا مدعی بھی بن گیا۔ پولیس کے ساتھ مل کر بیوی کو ڈھونڈنے کیلئے ملزم نے تفتیش کا رخ ایسا موڑا کہ تفتیش کار بھی چکرا گئے، مقتولہ بیوی کا موبائل دوست کے ہاتھ کراچی بھجوایا اور رضا مندی سے گھر چھوڑنے کے پیغامات اپنے نمبر سمیت تعلق داروں کو بھجوا دیئے۔ پولیس کا کہنا ہے کہ آخر کار ایک سال بعد تفتیش کاروں نے مقتولہ کی جائیداد اور حالات و واقعات کو مدنظر رکھ کر نئے سرے سے تحقیقات کیں تو سب کچھ سامنے آگیا۔ پولیس نے ملزم سے جائے وقوعہ کی نشاندہی کروا کر معاونت کرنیوالے دوست کو بھی حراست میں لے لیا۔

کریڈٹ: انڈیپنڈنٹ نیوز پاکستان-آئی این پی

ہزارہ ایکسپریس حادثے کے بعد دونوں ٹریکس بحال کر دئیے گئے ہیں جس کے بعد ٹرینوں کی آمدورفت شروع ہو گئی ہے۔ اتوار کو کراچی سے حویلیاں جانے والی ہزارہ ایکسپریس نوابشاہ میں سر ہاری ریلوے سٹیشن کے قریب حادثے کا شکار ہوئی تھی، حادثے میں ٹرین کی 10 بوگیاں پٹری سے اتر گئی تھیں جس کے نتیجے میں 30 افراد جاں بحق اور 80 سے زائد زخمی ہوئے تھے۔ حادثے کے بعد ڈان ٹریک تقریبا 18 گھنٹے بعد بحال کر دیا گیا تھا اور ٹرینوں کی روانگی بھی شروع ہوگئی تھی لیکن اپ ٹریک کی بحالی کا کام جاری تھا۔ فیڈرل گورنمنٹ انسپکٹر آف ریلوے علی محمد آفریدی کا کہنا تھا کہ ہزارہ ایکسپریس ٹرین حادثے میں اپ ٹریک 300 سے 400 فٹ متاثر ہوا، تاہم اب ٹریک کی بحالی کا کام مکمل ہو گیا ہے جس کے بعد دونوں ٹریکس بحال کر دئیے گئے ہیں۔ دوسری جانب حادثے کی ابتدائی رپورٹ بھی سامنے آ گئی ہے جس کے مطابق حادثے کی جگہ لائن کو جوڑنے والی فش پلیٹس نہیں تھیں، ٹوٹی پٹری کی جگہ لکڑی کا ٹکڑا لگایا گیا تھا۔ رپورٹ کے مطابق انجنیئرنگ اور مکینکل انجینیئرنگ کے شعبے کی ذمہ داری بھی بنتی ہے، حادثے کے شکار انجن کے ویل بھی خراب تھے، تخریب کاری کو خارج از امکان قرار نہیں دیا جا سکتا۔

کریڈٹ: انڈیپنڈنٹ نیوز پاکستان-آئی این پی

کورنگی چکرا گوٹھ میں 23 سال کی لڑکی کو سوتیلے باپ نے مبینہ زیادتی کا نشانہ بنا ڈالا۔ تفصیلات کے مطابق لڑکی سے مبینہ زیادتی کا مقدمہ قریبی تھانے میں درج کرلیا گیا جب کہ پولیس نے کارروائی کرتے ہوئے سوتیلے باپ کو بھی گرفتار کرلیا ہے۔ پولیس کو دیے گئے ابتدائی بیان میں ملزم نے اعتراف جرم کر لیا۔ دوسری جانب طبی معائنے میں لڑکی سے زیادتی کی تصدیق ہوگئی ہے۔

کریڈٹ: انڈیپنڈنٹ نیوز پاکستان-آئی این پی

کوئٹہ میں یونیورسٹی آف بلوچستان کے 2 طلبہ تنظیموں میں جھگڑے کے بعد بلوچستان یونیورسٹی غیر معینہ مدت کیلئے بند کر دی گئی۔ حکام کا کہنا ہے کہ آئندہ احکامات تک جامعہ تمام تعلیمی مقاصد کیلئے بند رہے گی۔ ایک اعلامیہ میں یونیورسٹی بند کیے جانے کی تصدیق کی گئی ہے، اعلامیے کے مطابق تمام طلبا کو یونیورسٹی ہوسٹل خالی کرانے کی ہدایت کر دی گئی ہے۔

کریڈٹ: انڈیپنڈنٹ نیوز پاکستان-آئی این پی

14 اگست کے قریب آتے ہی بازاروں میں جشن آزادی کی مناسبت سے ملبوسات اور اشیا کی خرید و فروخت میں بھی اضافہ ہو گیا۔ پرچم والی شرٹ بچوں بڑوں میں مقبول ہوگئیں۔ انارکلی سمیت شہر کی دیگرمارکیٹوں میں سٹال سج گئے۔ پرچم ،جھنڈیوں اور یوم آزادی کے حوالے سے سامان کی خریداری میں تیزی اگئی۔ خریداروں میں بچے، بڑے سبھی شامل ہیں پاکستانی پرچم والی شرٹ بچوں اوربڑوں میں یکساں مقبول ہے۔ لوگوں کا کہنا ہے 14 اگست کو ہمارا وطن عزیزآزاد ہوا تھا اپنی آزادی بھرپور انداز سے مناتے ہیں۔ بچوں کو خریداری کے ساتھ ساتھ آزادی کی اہمیت سے بھی اگاہ کر رہے ہیں۔ بچوں اوربڑوں کے ملبوسات میں پینٹ ،شرٹ ،شلوار،قمیض اجرک اورویسٹ کوٹ کا ٹرینڈ کافی زیادہ دیکھا جا رہا ہے خریداری کے لیے آنے والیکہتے ہیں پچھلے سال کی نسبت قمیتوں میں خاطرخواہ اضافہ ہوا ہے۔

کریڈٹ: انڈیپنڈنٹ نیوز پاکستان-آئی این پی

انسداد دہشت گردی عدالت لاہور نے جناح ہاؤس میں جلا ؤگھیراؤسمیت 9 مئی کے 6 مقدمات میں عمران خان کی بہنوں علیمہ خان اور عظمی خان سمیت شاہ محمود قریشی، فواد چوہدری اور اسد عمر کی عبوری ضمانتوں میں توسیع کردی۔ لاہور کی انسداد دہشت گردی عدالت کے جج اعجاز احمد بٹڑ نے جناح ہاوس میں جلا وگھیرا وسمیت 9 مئی کے 6 مقدمات پر سماعت کی، شاہ محمود قریشی، اسد عمر، علیمہ خان اور عظمی خان عبوری ضمانت کی میعاد ختم ہونے پر عدالت پہنچے، عدالت نے پولیس سے ریکارڈ طلب کر رکھا ہے۔ عدالت نے شاہ محمود قریشی، فواد چوہدری اور اسد عمر کی عبوری ضمانت میں توسیع کردی جبکہ پی ٹی آئی چیئرمین عمران خان کی بہنوں علیمہ خان اور عظمی خان کی عبوری ضمانتوں میں بھی توسیع کردی گئی۔ ایڈووکیٹ رانا مدثر نے اپنے دلائل میں کہا کہ ملزمان شامل تفتیش ہوچکے ہیں، عدالت ملزمان کی عبوری ضمانتیں کنفرم کرنے کا حکم دے۔ وکیل نے مزید کہا کہ شاہ محمود قریشی، علیمہ خان، عظمی خان اور اسد عمر کسی بھی واقعے میں ملوث نہیں۔

کریڈٹ: انڈیپنڈنٹ نیوز پاکستان-آئی این پی

چلاس شہر اور مضافات میں موسلا دھار بارش کے بعد موسم خوشگوار ہو گیا ۔ تفصیلات کے مطابق چلاس شہر اور مضافات میں بارش کے بعد شاہراہ قراقرم کئی مقامات پر بند ہو گئی ہے جبکہ بابو سر روڈ پر بھی ٹریفک معطل ہے۔ محکمہ موسمیات کے مطابق بالائی پنجاب، خطہ پوٹھوہار، خیبر پختونخوا، کشمیر اور گلگت بلتستان میں بارش کا امکان ہے۔ دوسری جانب گزشتہ روز کراچی کے مختلف علاقوں میں بھی بوندا باندی ہوئی، جبکہ تیز ہوائیں چلنے سے شہر کا موسم خوشگوار ہے۔

کریڈٹ: انڈیپنڈنٹ نیوز پاکستان-آئی این پی

ڈیرہ غازی خان کی غازی یونیورسٹی کی طالبہ نے الزام عائد کیا ہے کہ یونیورسٹی کے شعبہ فزکس کے 2 اساتذہ نے اسے زیادتی کا نشانہ بنایا ہے۔ طالبہ نے الزام عائد کیا کہ اب دونوں اساتذہ اس کی چھوٹی بہن کو بلیک میل کر رہے ہیں۔ دوسری جانب ترجمان یونیورسٹی کا کہنا ہے کہ سوشل میڈیا پر گردش کرنے والا ویڈیو بیان پرانا معاملہ ہے۔ ترجمان یونیورسٹی نے کہا کہ متاثرہ طالبہ کی شکایت پر کارروائی عمل میں لائی گئی تھی، دونوں اساتذہ کو معطل کر کے محکمانہ کارروائی کی جارہی ہے۔

کریڈٹ: انڈیپنڈنٹ نیوز پاکستان-آئی این پی

عوامی مسلم لیگ کے سربراہ و سابق وفاقی وزیر داخلہ شیخ رشید احمد نے کہا ہے کہ بلاول کو آخری دن سمجھ آئی ہے کہ حکومت اداروں کو اپنی حدود میں کام کروانے میں ناکام رہی ہے، رخصتی میں 48 گھنٹے رہ گئے ہیں تو انہیں میثاق جمہوریت کی قبر یاد آ گئی ہے۔ سماجی رابطے کی ویب سائٹ ایکس (ٹوئٹر) پر ایک پیغام میں شیخ رشید کا کہنا تھا کہ جو کہتے تھے ڈالر اور سرمایہ کاری لائیں گے انہوں نے آسمان سے مہنگائی کی بارش کی ہے، ابھی تک فیصلہ نہیں ہو سکا کہ 24 کروڑ عوام والے ایٹمی ملک کی نگران حکومت کی گھنٹی کس کے گلے میں ڈالنی ہے اور کتنے عرصے کیلئے ڈالنی ہے۔ انہوں نے کہا کہ سپریم کورٹ مزید خاموش رہی تو سب کچھ بہہ جائے گا، چلمن کے پیچھے والے چہرے سامنے آجائیں گے، آئین اور قانون ہاتھ جوڑ کر باادب کھڑا ہو جائیگا، اتحادی پارٹیوں میں اتحاد کیعلاوہ ہر چیز موجود ہے، نگران وزیراعظم کا فیصلہ بھی پارلیمانی کمیٹی یا الیکشن کمیشن کے پاس جا سکتا ہے۔ سربراہ عوامی مسلم لیگ کا کہنا تھا کہ 24 کروڑ لوگوں کو بھیڑ بکریوں کی طرح چلایا جا رہا ہے، الیکشن میں جا رہے ہیں مگر الیکشن کمیشن کا حلقہ بندیوں پر اور نئی مردم شماری پر ابھی تک واضح اعلان سامنے نہیں آیا، حکومت بجلی صارفین پر مزید 144 ارب روپے کا بوجھ ڈال سکتی ہے۔ سابق وزیر داخلہ نے کہا کہ ڈالر عنقریب 300 کراس کر جائے گا، غریب چیختا چلاتا رہ جائے گا، جب تک عوام کو قومی معاملات میں شامل نہیں کیا جائے گا اس وقت تک ملک کے سیاسی، اقتصادی، معاشی اور مالیاتی حالات ٹھیک نہیں ہو سکتے۔

کریڈٹ: انڈیپنڈنٹ نیوز پاکستان-آئی این پی

جناح ہاؤس میں جلاؤگھیرا ؤاورتوڑ پھوڑ کے مقدمات میں چیرمین پی ٹی آئی کی ایک روزہ حاضری معافی کی درخواست پر فیصلہ محفوظ کرلیا گیا۔ انسداددہشت گردی عدالت میں جناح ہاؤس میں جلاو گھیراو اور توڑ پھوڑ کے مقدمات کی سماعت ہوئی۔وکیل درخواست گزار نے کہا کہ چیئرمین پی ٹی آئی کو گرفتار کرلیا گیا ہے، عدالت میں آج اپیل دائرکررہے ہیں،امید ہے چیرمین پی ٹی آئی کی سزا ایک ہفتے تک معطل ہوجائیگی۔فاضل جج نے ریماکس دئیے کہ آپ اپیل کی سماعت کے لیے مقرر ہونے اور سزا معطل ہونے پر اتنا پرامید کیوں ہیں۔ وکیل سلمان صفدر نے کہا چیئرمین پی ٹی آئی پیش ہونا چاہتے ہیں، حالات ایسے ہیں کہ وہ نہیں آسکتے،وکیل برہان معظم نے کہا آپ درخواست گزارکیپروٹیکشن آرڈرجاری کریں۔ فاضل جج نے کہا اس پرسرکارکیا کہتی ہے؟ اسپیشل پراسکیوٹر فرہادعلی شاہ قانون بڑا کلئیر ہے، آپ انکی ضمانتیں مسترد کریں۔ بیرسٹرسلمان صفدر نے کہا چیئرمین پی ٹی آئی جلد اپنی آزادی کوانجوائے کرینگے،وہ باقاعدگی کیساتھ عدالت پیش ہوتے رہے ہیں۔ عدالت نے چیئرمین پی ٹی آئی کی ضمانتوں میں حاضری معافی کی درخواست پرفیصلہ محفوظ کرلیا گیا۔

کریڈٹ: انڈیپنڈنٹ نیوز پاکستان-آئی این پی

پاک فوج نے میجر طفیل محمد شہید کے 65 ویں یوم شہادت پر شاندار خراج عقیدت پیش کیا۔ پاک فوج کے شعبہ تعلقات عامہ (آئی ایس پی آر) کے مطابق چیئرمین جوائنٹ چیفس آف سٹاف کمیٹی اور سروسز چیفس نے میجر طفیل محمد شہید (نشان حیدر) کو ان کے 65 ویں یوم شہادت پر شاندار خراج عقیدت پیش کیا، میجر طفیل محمد شہید نشان حیدر کا اعزاز پانے والے دوسرے شہید ہیں۔ آئی ایس پی آر نے کہا کہ میجر طفیل محمد شہید نے 1958 میں مشرقی پاکستان کے لکشمی پور سیکٹر میں جرت اور بہادری سے دشمن کا مقابلہ کرتے ہوئے جام شہادت نوش کیا۔ پاک فوج کے شعبہ تعلقات عامہ کا مزید کہنا تھا کہ ان کی شہادت ہمیں وطن عزیز کے دفاع کیلئے دی گئی پاک فوج کی غیر معمولی قربانیوں کی یاد دلاتی ہے، قوم کو اپنے ان بہادر سپوتوں پر فخر ہے۔

کریڈٹ: انڈیپنڈنٹ نیوز پاکستان-آئی این پی

چین کے شمالی صوبے ہیبی کےشہر ژوژو کی لن جیاتون ٹاؤن شپ میں سیلاب کے بعد بحالی کے لیے نکاسی آب کی کارروائیاں جاری ہیں۔(شِنہوا)

چین کے شمالی صوبے ہیبی کےشہر ژوژو میں سیلاب کے بعد بحالی کے لیے ایک امدادی کارکن نکاسی آب کی کارروائیوں کے دوران  پمپ کے ارد گرد کوڑا کرکٹ صاف کر رہا ہے۔(شِنہوا)

چین کے صوبہ سیچھوان کے شہرچھنگ دو میں 31ویں ایف آئی ایس یو سمرورلڈیونیورسٹی گیمز میں چین اور ایران کے درمیان کانسی کے تمغے کے لیے مردوں کے والی بال مقابلےکےبعدچین کے لی یونگ ژین(درمیان) اپنی سالگرہ منارہے ہیں۔(شِنہوا)

چین کے صوبہ سیچھوان کے شہرچھنگ دو میں 31ویں ایف آئی ایس یو سمرورلڈیونیورسٹی گیمز میں چین اور ایران کے درمیان کانسی کے تمغے کے لیے مردوں کے والی بال مقابلےکےبعدچین کے لی یونگ ژین(درمیان) اپنی سالگرہ منارہے ہیں۔(شِنہوا)

افغانستان کے صوبہ بغلان کے ضلع سالنگ میں کابل کو نو شمالی صوبوں اور وسطی ایشیائی ریاستوں سے ملانے والی مرکزی شاہراہ کی تعمیر نو جاری  ہے۔ (شِنہوا)

چین کے صوبہ سچھوان کے شہر چھنگ دومیں 31ویں ایف آئی ایس یوسمر ورلڈ یونیورسٹی گیمز میں مردوں کی غوطہ خوری کے 10 میٹر پلیٹ فارم مقابلے میں سونے کا تمغہ جیتنے والےچین کے ہوانگ ژیگان (درمیان)، چاندی کا تمغہ جیتنے والے چین کے یانگ لنگ (بائیں) اور کانسی کا تمغہ جیتنے والے جنوبی کوریا کے شن جنگوی ایوارڈ تقریب میں تصویربنوا رہے ہیں۔(شِنہوا)

چین کے صوبہ سچھوان کے شہر چھنگ دومیں 31ویں ایف آئی ایس یوسمر ورلڈ یونیورسٹی گیمز میں مردوں کی غوطہ خوری کے 10 میٹر پلیٹ فارم مقابلے میں سونے کا تمغہ جیتنے والےچین کے ہوانگ ژیگان (درمیان)، چاندی کا تمغہ جیتنے والے چین کے یانگ لنگ (بائیں) اور کانسی کا تمغہ جیتنے والے جنوبی کوریا کے شن جنگوی ایوارڈ تقریب میں تصویربنوا رہے ہیں۔(شِنہوا)